SQO-da qutqarý qyzmetiniń 65 mamany vaktsına saldyrdy

PETROPAVL. QazAqparat – Soltústik Qazaqstan oblysynda tótenshe jaǵdaılar departamentiniń 65 qyzmetkeri koronavırýsqa qarsy ekpe aldy. Qalǵandary jaqynkúnderi óńirge qajetti vaktsına kelisimen egilmek, dep habarlaıdy QazAqparat tilshisi.

«SQO TJD Órt sóndirý jáne avarııalyq-qutqarý jumystary qyzmeti» MM baspasóz qyzmetiniń málimetinshe, vaktsınatsııanyń aldynda azamattyq qorǵaý organdarynyń qyzmetkerleri arasynda aýqymdy profılaktıkalyq jumys júrgizildi.

Ekpe alýdyń mańyzdylyǵy túsindirildi, jadynamalar taratyldy, Petropavldaǵy№ 2 emhana ókili - epıdemıolog dáriger Farıda Muhamedjanovamen kezdesý uıymdastyryldy.

«Dáriger profılaktıkalyq egýlerge qatysty normatıvtik qujattarmen tanystyryp, vaktsına egýge medıtsınalyq qarsy kórsetilimderdiń tizimin, koronavırýstyq ınfektsııaǵa qarsy vaktsınany engizý mehanızmi men taktıkasy týraly aıtty. Sondaı-aq, qyzmetkerlerdiń suraqtaryna jaýap berdi», - deıdi «SQO TJD Órt sóndirý jáne avarııalyq-qutqarý jumystary qyzmeti» MM baspasóz hatshysy Amangeldi Áýeshanov.

Qutqarýshylardyń alǵashqy legi – 65 adam № 2 emhanada COVID-19-ǵa qarsy vaktsınany aldy. Qalǵan qyzmetkerler jaqyn kúnderi óńirge vaktsına kelisimen egilmek.

«Medıtsınalyq mekemede barlyq qajetti qaýipsizdik sharalary men áleýmettik qashyqtyqty saqtaı otyryp ekpe aldyq. Bul – jaýapty sheshim. Otbasym men aınalamdaǵy adamdar aldyndaǵy jaýapkershilikti túsine otyra vaktsına saldyrdym», - deıdi Petropavl qalasynyń № 2 mamandandyrylǵan órt sóndirý bóliminiń Danııar Álimkın.

SQO sanıtarııalyq-epıdemıologııalyq baqylaý departamentiniń málimetinshe, óńirde 6980 adam vaktsınanyń birinshi komponentin aldy. 2280 adam tolyq vaktsınalaýdan ótti.

Buǵan deıin SQO-da koronavırýs vaktsınasynyń turǵyndarǵa da salynyp jatqanyn aıtqan edik. Óńirde ekpeni 16 pýnkte tegin alýǵa bolady.