SQO-da qus tumaýynan 1,5 mıllıonǵa jýyq taýyq qyrylǵan

PETROPAVL. QazAqparat – Soltústik Qazaqstan oblysynda qus tumaýynan keıin turalap qalǵan qus sharýashylyǵy qaıta qalpyna keltirilmek. Jumyrtqa óndirisin arttyrý maqsatynda 627,5 myń taýyq satyp alyndy, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, byltyr qus tumaýy órshigen kezde óńirdiń úsh qus fabrıkasy shyǵynǵa batty. «Fırma Alekrı» JShS 521 myń, «Beskól qus fabrıkasy» JShS 359 myń jáne «Adel Kýs» JShS 589,3 myń qusynan aıyryldy.

Óńirdi jumyrtqamen qamtyp kelgen sharýashylyqtar bul salany qaıta jandandyrmaq. Byltyr qarasha-jeltoqan aılarynda qus fabrıkalaryna 627,5 myń qus jetkizildi. Sonyń ishinde «Fırma Alekrı» JShS 250 myń, «ıAkorskaıa PTF» JShS 140 myń, «Adel Kýs» JShS 156 myń, al «Esılskaıa PTF» JShS 81,5 myń taýyq balapany alyndy.

Naýryz aıynan bastap «Fırma Alekrı» jumyrtqa óndirisin jolǵa qoısa, «Adel kýs» JShS ónimi mamyr aıynda dúken sórelerine túsedi.

«Bıyl jyl sońyna deıin óńirdiń qus fabrıkalaryna bir táýliktik 1 mln 055 myń shóje jetkizilip otyrady. Budan basqa qus sharýashylyǵynyń etti baǵytyn damytý úshin 2 broıler qus fabrıkasyn salý josparda bar. Olardyń ortaq qýattylyǵy jylya 15 myń tonna. Aqqaıyń aýdanynda salynatyn nysan 5,5 mlrd teńgege baǵalanǵan. «Severnyı broıler» JShS jylyna 5 myń tonna qus etin óndirmek. Al Petropavldaǵy «Petropavl broıler» JShS 2,4 mlrd teńgege qus fabrıkasyn turyǵyzyp, jylyna 10 myń tonna qus etin saýdaǵa shyǵarady», - deıdi SQO aýyl sharýashylyǵy jáne jer qatynastary basqarmasynyń basshysy Erbolat Bekshenov.