SQO-da qus fabrıkasy óz ónimderi arqyly jurtty sanıtarlyq talaptardy saqtaýǵa shaqyryp jatyr
#3jańadaǵdy chellendji «Atameken» kásipkerler palatasynyń bastamasy. SQO-da aktsııany alǵashqylardyń biri bolyp «Fırma Alekrı» JShS qoldady. Olar jumyrtqa qaptamalaryna halyqty maska taǵýǵa, áleýmettik ara qashyqtyqty saqtaýǵa jáne qoldy jıi jýyp turýǵa shaqyrǵan japsyrmalardy japsyryp, saýdaǵa shyǵardy. Ónim oblys ortalyǵyndaǵy saýda oryndarynda satylyp jatyr.
«Búginde qoǵam da, bıznes te qıyn jaǵdaıdy bastan keshirip jatyr. Jaǵdaı tezirek túzelip, burynǵy úırenshikti ómir saltyna oralý úshin árqaısymyz úles qosýymyz kerek. Al ol úshin barlyǵymyz sanıtarlyq normalardy saqtaǵanymyz jón. Ol úshin qoǵamdyq oryndarda maskany tastamaı, áleýmettik ara qashyqtyqty saqtap, qoldy jıi jýyp turý qajet. Bul talaptardy eske salatyn japsyrmalar qus fabrıkasynyń ónimderinde paıda boldy. Olar bizdiń usynysymyzdy birinshi blyp qabyl aldy», - deıdi SQO Kásipkerler palatasynyń dırektory Arman Orazǵulov.
«Alekrı» qus fabrıkasy – óńirdegi jumyrtqa shyǵaratyn iri kásiporyndardyń biri. Jylyna 150 mln jumyrtqa jáne 300 myń tonna qus etin shyǵarady. Budan basqa onyń negizinde eginshilik keshen, saýda jabdyǵy óndirisi, kólik tsehy jáne shaǵyn naýbaıhana jumys isteıdi.
«Biz qashanda salamatty ómir saltyn qoldaımyz. Qazir densaýlyq birinshi orynǵa shyqqanda árıne profılaktıkalyq jumystardyń mańyzy zor. Bul daǵdylar bizdiń ómirimizde qalyptasqan jaǵdaıda ǵana vırýsty jeńemiz. Sondyqtan barlyǵyn osy bir qıyn emes sanıtarlyq talaptardy saqtaýǵa shaqyramyn», - deıdi qus fabrıkasynyń dırektory Aleksandr Prıadko.
Qus fabrıkasy jańashyldyqqa jaqyn. Byltyr Prezıdent saılaýy qarsańynda kásiporynnyń jumyrtqalarynda saılaýǵa shaqyrǵan jazý paıda bolǵan edi.