SQO-da qýańshylyq saldarynan jemazyq jetispeýshiligi týyndaýy múmkin
Jeri qunarly, shóbi shúıgin keletin SQO bıyl qýańshylyqtyń zardabyn tartýy yqtımal. Kóktemde jaıqalyp shyqqan kók shóp jaýyn-shashynnyń azdyǵynan kúıip ketti. Shabyndyqqa shalǵy salǵan aýyl turǵyndarynyń aıtýynsha, aǵashtardyń baýraıynda ǵana azyn-aýlaq shóp bar.
«Oblysta keı sharýashylyqtar men turǵyndar shóp shabýdy bastap ketti. Búginge deıin 14,5 myń tonna shóp jınaldy. Bul barlyq qajettiliktiń 1,9 %- y. Jalpy óńir 750 myń tonna shóp jınaýdy josparlaǵan», - deıdi SQO aýyl sharýashylyǵy jáne jer qatynastary basqarmasy agronomııa bóliminiń basshysy Baqtııar Toqjigitov.
Mamandardyń aıtýynsha, óńirde jappaı shóp shabý shilde aıynyń ortasynda bastalady.
«Bıylǵy aýa raıyna baılanysty jem-shóp jetispeýshiligi máselesin sheshýde barlyq tıisti sharalardy qolǵa alýymyz qajet. Sonyń biri - kúzgi oraq kezinde sabandy usaqtamaı, ony jemazyqqa paıdalaný», - deıdi Baqtııar Toqjigitov.
Bul máseleni óńir basshysy Qumar Aqsaqalov ta nazarda ustap otyr.
«Bıyl jaýyn-shashyn az. Ylǵaldyń jetispeýshiliginen shóp shyqqan joq. Desek te maldarǵa jemazyqty artyǵymen bolmasa da, qajetinshe jınap alamyz. Sharýashylyqtardy da eskertip jatyrmyz, bıyl sabandy da paıdalanýǵa týra keledi», - dedi BAQ ókilderimen kezdesý barysynda oblys ákimi.
Byltyr óńir shópti artyǵymen jınap aldy. 750 tonna qajet bolsa, jospar 100,2 %-ǵa oryndaldy. Buǵan qosymsha qysqa 195,6 tonna súrlem, 1319,2 myń tonna saban jáne 207,7 myń tonna pishen ázirledi.