SQO-da Qojabergen jyraýdyń 360 jyldyǵy atap ótildi

PETROPAVL. QazAqparat – Bıyl «Elim-aı» dastanyna 300 jyl toldy. Kópke deıin halyq áni sanalyp kelgen bul týyndynyń avtory Qojabergen Tolybaıuly ekendigi dáleldendi. Soltústik Qazaqstan oblysynda qolbasshy, aqyn, memleket qaıratkeri Qojabergen jyraýdyń 360 jyldyǵyna arnalǵan mereıtoılyq is-sharalar ótti, dep habarlaıdy QazAqparat tilshisi.

Qojabergen jyraý SQO qazirgi Jambyl aýdanynyń Kúltóbe degen jerinde dúnıege kelgen. Tarıhta birneshe shyǵys tilin jetik bilgen, shejireshi, bilimdar, aqyn-jyraý, batyr qolbasshy retinde belgili. 1763 jyldyń qazan aıynda júz birge qaraǵan shaǵynda qaıtys bolǵan eken. 2018 jyly Petropavlda Qojabergen jyraýǵa arnalǵan 12 metrlik músin-eskertkish qoıyldy. Búgin sol alyp eskertkishke gúl shoqtary qoıylyp, rýhyna taǵyzym etildi.

Keıin «Aqtaban shubyryndy, Alqakól sulama» zamanynyń «Elim-aı» dastanyna 300 jyl» atty ǵylymı-teorııalyq konferentsııa ótti. Oǵan SQO ákimi Aıdarbek Saparov, Eýrazııa ulttyq ýnıversıtetiniń professory Serik Negımov, «Jeti jarǵy jáne Qojabergen jyraý» qaıyrymdylyq qorynyń tóraǵasy Beket Turǵaraev, Qazaqstan Jazýshylar odaǵy tóraǵasynyń orynbasary Qasymhan Begmanov, fılologııa ǵylymdarynyń doktory Qulbek Ergóbek, «Qaharman» qorynyń tóraǵasy Sabyr Qasymov jáne elimizdiń tarıhshylary, jazýshylary qatysty.

Respýblıkalyq konferentsııany oblys ákimi Aıdarbek Saparov ashyp, Qojabergen jyraýdyń uly murasynyń mańyzdylyǵyna toqtaldy.

«Qojabergen babamyzdyń artyna qaldyrǵan rýhanı murasy óte baı. Solardyń ishinde «Elim-aı» dastanynyń orny bólek. Ataqty jyraý bul eńbeginde ózi ómir súrgen dáýirdi, qazaq halqynyń qabyrǵasy qaıysqan zamandy sýretteıdi. Qojabergen jyraýdyń shyǵarmashylyǵyn zertteý jáne bolashaq urpaqqa jetkizý isi jalǵasyn tabady. Búgingi konferentsııa da ataqty jyraýdy ulyqtaýǵa, eńbekterin nasıhattaýǵa kóp úles qosary anyq», - dedi Aıdarbek Saparov.

Respýblıkalyq konferentsııaǵa qatysýshylar Qojabergen Tolybaıuly týraly tyń derektermen bólsti. Elimiz táýelsizdik alǵannan keıin ǵana jyraýdyń ómiri men shyǵarmashylyǵy júıeli zerttelip, jazyla bastady. Bul iske bilikti tarıhshylar, ádebıetshi ǵalymdar, jazýshy, jýrnalıster qaýymy belsene aralasyp, kitaptar men zertteý maqalalar jaryq kórdi.

Sondaı-aq bul kúni konferentsııaǵa qatysýshylar Sábıt Muqanov atyndaǵy qazaq sazdy-drama teatrynda «Daýylpaz baba — Qojabergen» dastanyn tamashalady.

Búginde SQO Jambyl aýdanynyń ortalyǵy Presnovkadaǵy qazaq mektebiniń aldyndaǵy alań Qojabergen atymen atalyp, eskertkish bıýsti ornatyldy, mektepke aty berilip, murajaıy ashyldy. Petropavldaǵy №6 qazaq orta mektebi de uly jyraýdyń esimimen atalady.