SQO-da qosymsha 1,6 myń adam múgedekterdi baqqany úshin járdemaqy alady

PETROPAVL. QazAqparat – Soltústik Qazaqstan oblysynda mamandar áleýmettik qamsyzdandyrý júıesindegi ózgerister jaıynda aıtty. Bıyl qosymsha 1,6 myń adam járdemaqy almaq, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngide Eńbek, áleýmettik qorǵaý jáne kóshi-qon komıtetiniń SQO boıynsha departament basshysynyń orynbasary Gúlbaqyt Manabaevanyń aıtýynsha, endi 1 toptaǵy múgedek adamdarǵa kútim jasaıtyn barlyq azamattarǵa járdemaqy tólenbek. Buryn tek bala kezinen 1 toptaǵy múgedek adamdarǵa kútim jasaıtyn azamattarǵa ǵana járdemaqy tólenetin. Járdemaqy mólsheri – 48 myń teńge. Al otbasynda eki jáne odan da kóp birinshi toptaǵy múgedek turatyn jaǵdaıda, kútimdi jasaıtyn adamǵa járdemaqy olardyń árqaısysyna taǵaıyndalyp, tólenbek. Tek múgedek te, oǵan kútim jasaıtyn adam da bir eldi mekende turýǵa tıis.

«Járdemaqy ótinish bergen kúnnen bastap birinshi toptaǵy múgedektik belgilengen búkil kezeńge taǵaıyndalady jáne tólenedi. Nátıjesinde oblys boıynsha 1,6 myńnan astam adam qosymsha járdemaqymen qamtylady. Ol úshin járdemaqy taǵaıyndaý týraly ótinish pen qajetti qujattardy tıisti mekemege tapsyrý qajet», - deıdi Gúlbaqyt Manabaeva.

Sondaı-aq, balanyń densaýlyǵynyń buzylý jáne tirshiliginiń shektelý dárejesin eskere otyryp, zańda 7 jastan 16 jasqa deıingi balalardy múgedektik toptary boıynsha bólý kózdelgen. Bul kórsetiletin ońaltý is-sharalary men áleýmettik kómekti, onyń ishinde balalar aýrýynyń aýyrlyq dárejesine qaraı járdemaqylar mólsherin saralaýǵa múmkindik bermek.

Búginde 16 jasqa deıingi múgedek balalarǵa beriletin járdemaqynyń mólsheri birdeı, ol – 48 myń teńgeni quraıdy. Endi 7 jastan 16 jasqa deıingi múgedek balalarǵa toptary úshin járdemaqy mólsheri 16,7 %-dan 37 %-ǵa deıin ulǵaıtylmaqshy.

«1 toptaǵy múgedek bala 65 860 teńge alatyn bolady (+17837 tg), 2 toptaǵy múgedek bala 54541 teńge (+6518 tg), 3 toptaǵy múgedek bala ózgerissiz, ıaǵnı 48023 teńge járdemaqy alatyn bolady. Qazir oblysta 7 jastan 16 jasqa deıingi múgedek balalar sany – 1368», - deıdi departament basshysynyń orynbasary.

Qazir departamenttiń medıtsınalyq-áleýmettik saraptama bólimderi 7 jastan 16 jasqa deıingi múgedektik sanatyn medıtsınalyq jeke isindegi málimetter negizinde qaıta qarastyryp jatyr.