SQO-da koronavırýstan qaıtys bolǵandar sany 300-ge jetti

PETROPAVL. QazAqparat – Soltústik Qazaqstan oblysynda ótken táýlikte koronavırýstan 4 naýqas kóz jumdy, osylaısha shamamen sońǵy úsh aıdyń ishinde 256 adam qaıtys boldy, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, 1 qarasha kúni oblysta koronavırýs juqtyrýdyń jańa 137 jaǵdaıy tirkeldi. Onyń ishinde Petropavlda 65 adam, Qyzyljar aýdanynda – 17, Jambyl aýdanynda 11 adam aýyrǵan. Taıynsha men Esil aýdandarynda – 7, Aqqaıyń aýdanynda – 6 syrqat anyqtalǵan. Taǵy tórt aýdanda 1-2 adam aýyrsa, Tımırıazev pen Ǵ.Músirepov atyndaǵy aýdandarda jańa jaǵdaılar tirkelmedi.

Osylaısha indet juqtyrǵandar sany 28 945-ke jetti. Qazirgi ýaqytta qaýipti ınfektsııamen aýyratyndarǵa arnalǵan 2 myńǵa jýyq oryn bar. Onyń 1755-i ınfektsııalyq statsıonarlarda, qazir munda 760 adam em alyp jatyr. Karantındik 110 oryn bolsa, oǵan 20 adam ornalastyrylǵan. Al jansaqtaý oryndary 115-ten 121-ge deıin kóbeıtildi. Jaǵdaıy aýyr 51 adam dárigerlerdiń baqylaýynda.

Óńirde sońǵy úsh aıdyń ishinde koronavırýstan qaıtys bolǵandar sany artty. Іndet bastalǵannan osy jyldyń 15 shildesine deıin 43 adam kóz jumsa, osy ýaqyttan búginge deıin 256 adam qaıtys bolǵan. Mamandardyń aıtýynsha, olardyń 80 % - jasy 60-tan asqandar.