SQO-da koronavırýs juqtyrǵandar sany kúrt artty

PETROPAVL. QazAqparat – Soltústik Qazaqstan oblysynda ótken táýlikte 101 adam koronavırýs juqtyrdy, ınfektsııalyq statsıonarlarda 229 adam em alyp jatyr, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, koronavırýs juqtyrǵandar sany artyp keledi.

15 qańtar «jasyl» aımaqta bolǵan óńir búgin «qyzyl» aımaqqa ótti.

Aýyrǵandar sany shamamen tórt ese artyp, ótken táýlikte koronavırýs juqtyrýdyń jańa 101 jaǵdaıy tirkeldi.

Qazir ınfektsııalyq statsıonarlarda 229 adam em alyp jatyr. Emdeý mekemeleri 18 %-ǵa tolǵan. 21 adam jansaqtaý bólimshelerine ornalastyrylǵan.

SQO-da jalpy aýyrǵandar sany 35 388 adamǵa jetip otyr. Onyń 32 936-sy táýir boldy.

Qaıtys bolǵandar sany da kúnnen-kúnge artyp keledi, ótken táýlikte bir adam kóz jumyp, 455 adamǵa jetti.

Esterińizge salaıyq, 15 qańtardan bastap SQO bas memlekettik sanıtar dárigeriniń jańa qaýlysy kúshine endi.

Búgin óńirdiń birqatar mektebi qashyqtan oqytý formatyna kóshken.