SQO-da koronavırýs naýqastaryna kúndelikti 9 tonna ottegi jumsalady

PETROPAVL. QazAqparat – Soltústik Qazaqstan oblysynda koronavırýsty juqtyrǵandar sany sońǵy eki aptada 5,3 % tómendegenimen. Jaǵdaı áli de turaqtalǵan joq, aýyrǵandardyń jartysynan astamy ottegige táýeldi, dep habarlaıdy QazAqparat tilshisi.

Óńirlik kommýnıkatsııalar qyzmetinde SQO-daǵy koronavırýsqa qatysty jaǵdaı boıynsha brıfıng ótti. Mamandardyń aıtýynsha, ótken táýlikte oblysta KVI juqtyrýdyń 138 jaǵdaıy tirkeldi.

«Sońǵy eki aptada oblysta 1919 jaǵdaı tirkelip, 5,3 % sál tómendeý baıqaldy. Alaıda óńirdiń keı aýdandarynda aýrý ósken. Oblys burynǵysynsha «qyzyl» aımaqta», - deıdi SQO Sanıtarııalyq-epıdemıologııalyq baqylaý departamentiniń basshysy Áset Jumataev.

Qazirgi ýaqytta oblystyń ınfektsııalyq statsıonarlarynda 608 syrqat jatyr, olardyń 60 % astamynyń jaǵdaılary aýyr.

«Jaǵdaı áli de alańdatarlyq, ınfektsııalyq statsıonarlardaǵy 68 naýqastyń jaǵdaıy asa aýyr. 49-y jansaqtaý, 23-i qarqyndy terapııa bólimderinde jatyr. 543 naýqas ottegige táýeldi, onsyz demala almaıdy. Iıa, ınfektsııalyq statsıonarlarda oryn kezeń-kezeńmen bosap jatyr. Qazir 608 adam jatsa, qyrkúıek-qazan aılarynda olardyń sany 800-900-ge deıin jetti. Búginde 363 adam qaıtys boldy. Kúndelikti 3-5 adamnan kóz jumady. Birer aı buryn kúndelikti 100 syrqattan qabyldap otyrsaq, qazir statsıonarlarǵa jatqyzylatyndar sany 60-qa deıin tómendedi. Biraq olardyń barlyǵy da qatty aýyryp túskender, sondyqtan qýanýǵa áli erte», - deıdi SQO densaýlyq saqtaý basqarmasy basshysynyń mindetin atqarýshy Nurlan Aımanov.

Ambýlatorlyq em alyp jatqandar sany 3,5 myńnan asady. Olardyń 1770-inde aýrý belgileri joq.

«Biz, medıtsınalyq qyzmetkerler, koronavırýs ınfektsııasynan sharshadyq. Bizdiń arman-maqsatymyz – juqpaly aýrýlar statsıonarlaryna suranystyń tómendeýi. Osylaısha, KVI-ge qatysy joq basqa syrqattarymyzǵa medıtsınalyq kómek berý. Al olar az emes. Qazirgi ýaqytta 2 myńnan astam medıtsınalyq qyzmetker koronavırýspen kúreske jumyldyrylǵan.

Túsip jatqan naýqastardyń jaǵdaılary aýyr, olarda ottegi jetispeýshiligi bar. Kúndelikti 9 tonnaǵa deıin ottegi jumsaımyz. Jaǵdaıdyń bulaı ýshyǵýyna eki sebep bar, birinshisi – karantındik jáne qarapaıym sanıtarlyq talaptardy saqtamaý. Ekinshisi – vaktsına almaý.

Búginge deıin vaktsına alǵan 242 702 adamnyń 3 802-sinde PTR-test oń nátıje kórsetken. Bul - 1,2 %. Bul syrqattanǵandardyń 51,8 % ǵana aýrýhanaǵa jatqyzyldy. Solardyń ishinde 89-y ǵana jansaqtaý bólimshesine jatqyzyldy. Ókinishke oraı, vaktsına alǵan 15 adam qaıtys boldy. Olardyń sozylmaly ilespe aýrýlary bolǵan», - deıdi Nurlan Aımanov.