SQO-da koronavırýs boıynsha jaǵdaı turaqtaldy

PETROPAVL. QazAqparat – Soltústik Qazaqstan oblysynda koronavırýs boıynsha jaǵdaı turaqtaldy. Infektsııalyq statsıonarlar 20 %-ǵa ǵana tolyq, dep habarlaıdy QazAqparat tilshisi.

SQO-da koronavırýsqa qatysty óńirdegi aǵymdaǵy jaǵdaı boıynsha brıfıng ótti. SQO densaýlyq saqtaý basqarmasy basshysynyń orynbasary Qumar Kúsemisovtiń aıtýynsha, óńirde jaǵdaı turaqtalǵan. Qazir oblystaǵy ınfektsııalyq statsıonarlarda 244 adam em alyp jatyr. Barlyq orynnyń tek 20 %-y ǵana tolyq. «Qazir óńirde vaktsınanyń ekinshi komponentin egý boıynsha jumys júrip jatyr. 22 aqpan kúni oblysqa Qaraǵandyda shyǵarylǵan reseılik «Spýtnık V» preparaty jetkizildi. Búginge deıin 900 adamǵa vaktsına egildi. Jaqyn kúnderi bul jumysty bitiremiz. Al naýryz aıynyń basynda vaktsınanyń

jańa partııasy jetkiziledi», - dedi Qumar Kúsemisov.

SQO-ǵa bul joly josparǵa saı 2800 doza vaktsına ákelinbek.

«Buǵan deıin 1200 adam KVI-ǵa qarsy vaktsına aldy. Esh aýytqýshylyqtar bolǵan joq. Sol sebepti ekpe saldyrýǵa túsinistikpen qaraýǵa shaqyramyn. Jalpy bizge vaktsına qoıdyrǵysy kelip ótinish bildirip jatqan turǵyndar kóp. Ekinshi partııasy kelisimen dárigerlerden keıin suranys boıynsha da ekpe egetin bolamyz», - deıdi SQO densaýlyq saqtaý basqarmasy basshysynyń orynbasary Qumar Kúsemisov.