SQO-da kópqabatty eki turǵyn úı paıdalanýǵa berildi

PETROPAVL. QazAqparat - Tuńǵysh Prezıdent kúni qarsańynda 126 soltústikqazaqstandyq baspanaly boldy. Jańa páterge ıe bolǵandar - halyqtyń áleýmettik az qamtylǵan sanatyna jatatyn azamattar men bıýdjettik uıymdardyń qyzmetkerleri, dep habarlaıdy QazAqparat.

Toǵyz jyl baspana kezeginde turǵan Sergeı men Tatıana Lıhtenvald buǵan deıin árkimniń úıin jaǵalap, jalǵa alyp kelgen edi. Endi, óz shańyraqtary bar. Beskólde «Nurly jer» memlekettik turǵyn úı baǵdarlamasy aıasynda salynǵan 3 qabatty turǵyn úıden jas otbasyǵa bir bólmeli páter buıyrdy. Búgin olar alǵashqy qonaqtaryn qarsy almaq. Tatıana mektepte aspaz bolyp eńbek etedi. Al, Sergeı zaýytta operator.

«Men jumysta bolǵam, áıelim telefon shalyp, bizge páter beredi dedi. Bastapqyda túsiniksiz sezimde boldym, ne qýanarymdy, ne jylarymdy bilmeı qaldym. Árıne, jumys jaıyna qaldy»,- deıdi jańa páter ıesi Sergeı Lıhtenvald.
 

Úsh qabatty turǵyn úı «Nurly jer» baǵdarlamasy aıasynda eki jyldyń ishinde boı kóterdi. Respýblıkalyq bıýdjetten shamamen 200 mln teńgedeı qarjy jumsaldy. Búgin mereke qarsańynda 30 beskóldik otbasy oblys ákiminiń qolynan páter kiltterin aldy.

«Osy merekelerde oblysta 40-tan astam áleýmettik-ekonomıkalyq nysan paıdalanýǵa beriledi. Jalpy, Qyzyljar aýdany bıylǵy jyldy óte jaqsy tabystarmen aıaqtaǵaly otyr. Egin oraǵynda ár gektardan 23,6 tsentnerden ónim alyp, oblysta birinshi orynǵa shyqty. Túrli jobalar iske aspaqshy. Qytaılyq ınvestorlar jemazyq zaýytyn salyp jatyr, 3 sút fermasy, kirpish zaýyty salynyp jatyr. Bıyl 21 áleýmettik nysan ortalyqtandyrylǵan jylytý qazandyǵyna qosyldy. Aldaǵy eki jylda Beskóldegi seksenge jýyq 2-3 qabatty úılerdi osy jylytý júıesine qosamyz», - dedi oblys ákimi Qumar Aqsaqalov qonys toıyn toılaýshylardy quttyqtap.
 

Jańa úı jetimderge, áleýmettik az qamtylǵan jáne kóp balaly otbasylaryna berildi. Páterler bir bólmeli. Turǵyndar 36 sharshy metrlik baspana úshin 5 jyl boıy aıyna 5 myń, 44 sharshy metr úshin 6,5 myń teńge tólep otyrady. Merzim ótkesin jekeshelendire alady. Al, kelesi jyly Beskólde «Nurly jer» baǵdarlamasy boıynsha 5 páterli turǵyn úı salý josparda bar. Qazir qujattary ázirlenip jatyr.

Al, Petropavl qalasynda paıdalanýǵa berilgen kópqabatty úı jańa «Bereke» yqshamaýdanynda boı kótergen. 96 otbasyǵa páter kiltterin óńir basshysy tabys etti.  «Nurly jer» baǵdarlamasy sheńberinde salynǵan baspana 1,2,3 bólmeli. Aýmaǵy 35-70 sharshy metrden. Al, bir sharshy metriniń quny - 137-139 myń teńge shamasynda.

Byltyr SQO-da 1300-den astam páter berilse, bıyl 1600 otbasy jańa jyldy jańa shańyraqta qarsy almaq.