SQO-da kolledj stýdenti «Jabaıy janýarlardy azyqtandyr» atty chellendj bastady

<p>PETROPAVL. KAZINFORM &ndash; Soltústik Qazaqstan oblysynyń 16 jastaǵy turǵyny Stanıslav Gvozdev ashyqqan jabaıy janýarlardy qorektendirip júr. Bul bastamany jasóspirim oqıtyn oqý orny da qoldap, &laquo;Jabaıy janýarlardy azyqtandyr&raquo; atty chellendjge qatysyp jatyr.</p>

Stanıslav Gvozdev SQO Qyzyljar aýdany Rassvet eldi mekeniniń turǵyny. Qazir Petropavldyń Borkı kentinde ornalasqan Soltústik Qazaqstan kásibı-pedagogıkalyq joǵary kolledjiniń 1-kýrsynda oqıdy. Bolashaq mamandyǵy kólik jóndeýmen baılanysty. 

Foto: SQO bilim basqarmasy baspasóz qyzmeti

«Úıge demalysta jıi baram. Jol boıynda ashyqqan elikter jıi ushyrasady. Olarǵa qalyń qardan azyq taýyp jeý qıyn. Keıbiri, ashyqqannan álsiregen. Sondyqtan janýarlar kóktemge aman-esen jetýi úshin azyqtandyrý kerek dep sheshtim», - deıdi Stanıslav Gvozdev. 

Ulynyń bastamasyna ákesi qoldaý kórsetken. Olar jeńil kólikke shóp artyp alyp, elikter júretin jerlerge shóp salynǵan qaptardy tastap, jem shashyp ketedi.

Foto: SQO bilim basqarmasy baspasóz qyzmeti

«Ata-anam aýylda mal ustaıdy. Jaz boıy biz ákemmen birge malǵa jem-shóp daıyndaımyz. Jabaıy janýarlarǵa berip jatqan shóp – osy jazda daıyndaǵan qorymyz. Ár demalys saıyn aýylǵa jaqyn ormanǵa qarda júrgish kólikpen baryp, shóp-jem tastap ketetinmin. Biraq aldygúni tehnıkam synyp qaldy. Sondyqtan shópti jol boıyna tastaýǵa týra keldi. Maǵan bul iste ata-anam kómektesedi», - deıdi Stanıslav Gvozdev. 

Stýdentteriniń «Jabaıy janýarlardy azyqtandyr» atty chellendj bastaǵanyn bilgen oqý orny endi oǵan qoldaý kórsetpek. Erteń kolledjdiń ustazdary men stýdentteri ormanǵa baryp, jabaıy janýarlarǵa azyq qaldyrmaq.