SQO-da kóktemde áskerge barýy tıis jigitterdiń orny tolmaı jatyr

PETROPAVL. QazAqparat – Soltústik Qazaqstan oblysynan bıyl kóktemde ásker qataryna 555 adam attanýy tıis, alaıda ázirge 210 jigit qana iriktelip alyndy, dep habarlaıdy QazAqparat tilshisi.

SQO ákimdiginde ótken jıynda kóktemgi áskerge shaqyrý naýqanynyń barysy pysyqtaldy.

Oblystyq qorǵanys isteri jónindegi departament bastyǵynyń orynbasary Marat Kárimovtyń aıtýynsha, qazirgi ýaqytta vedomstvo esebinde 16 516 áskerge shaqyrylýshy bar.

«Aldyn ala 2 313 adam zerdelenip, onyń ishinen 210 jigit iriktelip alyndy. Osylaısha, áskerge shaqyrý jospary ázirge 37,8 % ǵana oryndalyp otyr.

Jalpy kóktemde óńirden 555 adam ásker qataryna alynýy tıis. 12 naýryz ben 2 sáýir aralyǵynda 6 áskerı komanda quryp, attandyrýymyz kerek. Mamyr men maýsym aralyǵynda taǵy 8 komanda jiberiledi.

Qazirgi ýaqytta departament 2 komanda jasaqtap, olardy QR UQQ shekara qyzmetine attandyrdy. 22 adam barýy kerek bolsa, tek 10 áskerge shaqyrylýshy ǵana ketti», - deıdi Marat Kárimov.

Naýryz aıynan bastap 12 aýdandyq, qalalyq jáne oblystyq áskerge shaqyrý, medıtsınalyq komıssııasy jumys istep jatyr. Munda da másele bar.

Aýdandyq medıtsınalyq komıssııalarda 12 dáriger jetispeıdi. Olar Aıyrtaý, Esil, M.Jumabaev, Shal aqyn, Ýálıhanov aýdandarynda joq.