SQO-da kókónis alqaptary shamamen eki esege ulǵaıtylmaq

PETROPAVL. QazAqparat – Soltústik Qazaqstan oblysyn bıyl sábiz, kartop jáne qyryqqabatpen tolyq qamtý úshin egistik alqaptary shamamen eki esege deıin ulǵaıtylmaq, dep habarlaıdy QazAqparat tilshisi.

SQO ákimdiginde kóktemgi egis naýqanyna daıyndyq barysy pysyqtaldy.

Óńir basshysynyń birinshi orynbasary Marat Tasmaǵanbetovtyń aıtýynsha, bıyl 4,5 mln ga alqapqa daqyl egilmek. Memleket basshysynyń tapsyrmasyna oraı aýyl sharýashylyǵy daqyldaryn ártaraptandyrý boıynsha bıyl 3,2 mln ga dándi jáne burshaq dándi daqyldar, 960 myń ga maıly daqyldar, 353 myń ga jemshóp egilmek.

Al kartop 34,1 myń ga, kókónis 6,2 myń ga alqapty alatyn bolady.

«Óńirdiń azyq-túlik qaýipsizdigin qamtamasyz etý úshin, ishki naryqty áleýmettik mańyzdy azyq-túlikpen toltyrý maqsatynda bıyl qaraqumyq alqaby úsh esege – 9 myń ga 27 myń ga deıin ulǵaıtyldy. Sharýashylyqtar kartop alqaptaryn 1,5 ese – 4,8 myń ga 78 myń ga deıin jetkizip otyr. Sábiz alqaby 0,2 myń ga 0,4 myń ga deıin eki ese, qyryqqabat 0,1 myń ga 0,22 myń ga deıin 2,2 ese ulǵaıtylady. Bul jumys óńirdiń osy ónimderge qajettiligin tolyq jappaq», - deıdi Marat Tasmaǵanbetov.

Qazirgi ýaqytta óńirdiń aýylsharýashylyǵy qurylymdary tuqymmen tolyq qamtylǵan. Kóktemgi egisti ótkizýge 488,5 myń tonna tuqym qajet.

Bıyl jospar boıynsha 9,5 % tuqym jańartylmaq.