SQO-da «Qyzyljar jastary» ıpotekalyq baǵdarlamasy iske qosylady
SQO ákimi Ǵaýez Nurmuhambetov Petropavlda óńir turǵyndarymen kezdesip, júzege asatyn jobalarmen tanystyrdy.
«Baspana alý – ózekti máselelerdiń biri. Petropavlda bıyl «Qyzyljar jastary» jeńildetilgen ıpotekasyn iske qosamyz. Oǵan densaýlyq saqtaý, veterınarııa, mádenıet, sport, áleýmettik qorǵaý, azamattyq qorǵanys jáne energetıkada qyzmet etetin jas otbasylar qatysady. Jobaǵa suranys bar, adamdar kútýde, qarjy qarastyrylǵan», - dedi jaqsy jańalyqpen bólisken oblys ákimi.
Petropavl qalasyn damytý maqsatynda birneshe joba qolǵa alynbaq. Máselen, oblys ortalyǵynda qazirgi ýaqytta 600-ge jýyq aýla bar, onyń jartysyn jańartý qajet. Óńir basshysynyń aıtýynsha, bıyl 60 aýla jóndelmek. 5 jylda barlyǵy 260 aýla qamtylady. Sondaı-aq qalada 7 avtoturaq pen 20 jylytylǵan aıaldama ornatylady.
«Bıznestiń áleýmettik jaýapkershiligi aıasynda qoǵamdyq ataýly saıabaqtar qurylady. Bul bastamany kásipkerlerimiz qoldap, qarjylandyrýǵa kelisti. Olardyń ishinde: Gennadıı Zenchenko, Dmıtrıı Sharapaev syndy bıznesmender, «Sevkazenergo», «Qyzyljar sý» jáne «Alageum Electric» kásiporyndary bar. Joldardy jaqsartý boıynsha keshendi jumystar jalǵasady. Oblys ortalyǵyndaǵy kóshelerdiń barlyǵyna asfalt tóselmegeni jasyryn emes. Biz bıyl qalanyń shetine basymdyq beremiz. Petropavl ákimine 5 jylda qıyrshyq tas tóselgen joldardy asfaltqa aýystyrýdy tapsyrdym. Bıyl qalanyń 44 kóshesi jóndelmek, onyń ishinde 39 kóshede buryn asfalt bolmaǵan», - dedi Ǵaýez Nurmuhambetov.
Oblys ortalyǵyndaǵy ózekti máseleniń biri – qoǵamdyq kóliktiń jaǵdaıy. Petropavlda qazir 115 jańa avtobýs júr. Eski avtobýstar júretin marshrýttar da bar. Jyldyń ortasynda tasymaldaýshylar 30 jańa avtobýs satyp almaq.
Kezdesýde turǵyndar ózge de máseleni kóterip, suraqtaryna jaýap aldy. Oblys ákimi qoıylǵan suraqtardyń barlyǵyn baqylaýǵa almaq.