SQO-da qyzylshaǵa qarsy vaktsına egý úshin 250-den astam brıgada quryldy

<p>Soltústik Qazaqstan oblysynda qyzylsha juqtyrǵandar sany kúnnen-kúnge artyp keledi. Aýyrǵan 75 adamnyń shamamen ár úshinshisi &ndash; QR Ulttyq ulany akademııasynyń kýrsanty. Infektsııanyń aldyn alý úshin óńirde vaktsınatsııa belsendi júrgizilip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, qyzylshanyń zerthanalyq rastalǵan 75 jaǵdaıy tirkeldi, aýyrǵandardyń 68-i – Petropavl turǵyny. Jekelegen jaǵdaılar Aqqaıyń, Aıyrtaý Mamlıýt, Qyzyljar jáne Jambyl aýdandarynda tirkelip otyr.

«Vırýsty juqtyrǵandardyń 29-y – Ulttyq ulany akademııasynyń kýrsanty, al jalpy 14 jasqa deıingi 26 bala aýyrǵan. Odan keıin 15-19 jastaǵy 23 adam, 20-29 jastaǵy 14 adam qyzylshany juqtyrǵan. Syrqattanǵandardyń arasynda 50-den asqan eki adam bar. Jalpy aýyrǵandardyń 79% qyzylshaǵa qarsy vaktsına almaǵan», - deıdi Áset Jumataev.

SQO densaýlyq saqtaý basqarmasynyń basshysy Qumar Kúsemisovtiń aıtýynsha, óńirde qyzylsha juqtyrǵandardyń jaǵdaıy ortasha, jansaqtaý bóliminde jatqandar joq.

«Qazir 48 adam statsonarlyq em alyp jatyr. Onyń 18-i – bala. Oblys boıynsha syrqattanǵandarǵa arnalǵan 181 oryn bar. Al vaktsınatsııalaýǵa keler bolsaq, óńirde 256 ekpe jasaý brıgadasy quryldy. Olardyń 86-sy kóshpeli. Osy ýaqytqa deıin 3540 adam vaktsına saldyrdy. Ekpe alýdan qorqýdyń qajeti joq. Tekserilgen preparatty qoldanyp jatyrmyz. On jyldyń ishinde ekpeden keıin asqyný faktisi tirkelmedi», - deıdi Qumar Kúsemisov.