SQO-da qyzylsha juqtyrǵan eresekterdiń sany artyp keledi

<p>Soltústik Qazaqstan oblysynda qyzylshany juqtyrǵandardyń 60 % - 17 jastan asqan eresekter. Aýyrǵandardyń basym bóligi Petropavlda tirkelip otyr, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Óńirlik kommýnıkatsııalar qyzmetinde SQO sanıtarııalyq-epıdemıologııalyq baqylaý departamentiniń basshysy Áset Jumataev oblystaǵy qyzylsha aýrýyna qatysty jaǵdaıǵa toqtaldy.

Jyl basynan beri oblysta qyzylshanyń 77 jaǵdaıy tirkeldi, onyń 49-y zerthanalyq rastaldy.

«49 syrqattyń úsheýi qaterli dertti shetelden — BAÁ, Reseıden jáne Qyrǵyzstannan juqtyryp kelgen. Jas qurylymyna toqtalsaq — aýyrǵandardyń basym bóligi — 17 jas jáne odan asqandar. Bul barlyq aýyrǵandardyń 29 jaǵdaıy nemese 60%. Sonyń ishinde 17 -19 jastaǵylardyń 16-sy, 20-29 jastaǵylardyń beseýi, 30-39 jastaǵylardyń tórteýi, 40-49 jastaǵylardyń úsheýi jáne 50-59 jastaǵylardyń bireýi qyzylshany juqtyrǵan. Al 14 jasqa deıingi balalar arasynda aýyrǵandardyń basym bóligi — 5-9 jasta», — deıdi Áset Jumataev.

Sondaı-aq syrqattanǵandardyń 86% dertke qarsy ekpe almaǵan. Basym bóligi — Petropavl turǵyny.

«Asqyný jaǵdaılary bolǵan joq, búgingi tańda 8 adam aýrýhanada em alyp jatyr. Bul — ekpege baǵynatyn ınfektsııalardyń biri. Sondyqtan da mundaı aýrý anyqtalǵan jaǵdaıda mekemeler karantınge jabylmaıdy. Eger de aýyrǵan adammen baılanysta bolǵan egilmegen bolsa, onda vaktsına qoıylady. Desek te emdeý mekemeleri, statsıonarlar basqa syrqattarǵa juqtyrmaý úshin karantın engize alady», — dedi Áset Jumataev.