SQO-da kıeli jerlerdiń tizimi taǵy segiz nysanmen tolyqty
Soltústik Qazaqstan oblysy sý qoımalaryna baı, óńirde irili-usaqty 3 myńnan astam kól bar. Onyń ishinde emdik qasıeti mol tuzdy kólder de jeterlik. Qyzyljar óńiriniń kıeli jerleriniń kartasyna halyq arasynda tanymal jáne suranysqa ıe Meńgeser men Teke kólderi endi. Máselen Mamlıýt aýdanynda ornalasqan Meńgeser kóliniń sýynyń quramy Óli teńizdiń sýyna para-par ekenin buǵan deıin aıtqan bolatynbyz.
«3-4 qazan kúnderi biz óz jobamyzdy ortalyqta qorǵap shyqtyq. SQO-nyń kıeli jerleriniń tizimine taǵy 8 nysan qosylyp, 33-ke jetti. Bıyl alǵash ret sakraldy kartaǵa tabıǵı baılyǵymyz endi. Bizdiń óńirdiń kólderiniń emdik qasıeti ǵylymı dáleldengen. Endeshe nege olardy kıeli dep sanamasqa?» - deıdi SQO Tabıǵı-mádenı murany qorǵaý jáne paıdalaný ortalyǵynyń dırektory Raqat Mámbetalınov.
Kıeli jerlerdiń kartasyna soltústikqazaqstandyqtardyń maqtanyshy - Aıyrtaý-Imantaý-Shalqar tabıǵı kesheni, «Serebrıanyı bor» atty relıkt ormany da kirdi.
Budan basqa tizimnen Jambyl aýdanyndaǵy Súıindik batyrǵa arnalǵan eskertkish tasty, XIX ǵasyrda ómir súrgen, Abaıdyń ulylyǵyn alǵash bolyp dáleldep aıtqan, ult zııalysy Zeınelǵabıden ál-Jaýharıdiń jerlengen ornyn, XVIII ǵasyrda týǵan Jońǵar shapqynshylyǵy kezinde er Jánibektiń keńesshisi jáne senimdi serigi bolǵan Baıtalaq batyrdyń Qýlykól eldi mekeninde jerlengen ornyn da kórýge bolady. Sonymen qatar, oblys ortalyǵyndaǵy máńgilik alaý, saıası qýǵyn-súrgin qurbandarynyń monýmenti men Qarasaı jáne Aǵyntaı batyr eskertkishteri ornalasqan teatr alańy da kartaǵa endi.
«Biz kıeli jerler kartasynyń tizimin tolyqtyrar kezde barlyq aýdan ortalyqtary men eldi mekenderdi aralap shyqtyq. Biraq halyq arasynda mańyzy bar keıbir jerler bizdiń nazarymyzdan tys qalýy múmkin. Sondyqtan da, eger óńir turǵyndary tarıhı máni bar óz aýyldaryndaǵy nysandardy usynsa, zerttep kóremiz», - deıdi Raqat Mámbetalınov.