SQO-da keı mekemelerdi qaıta qurý arqyly 65,9 mln teńge únemdelmek
Bul jaıynda «Qyzyljar - adaldyq alańy» jobalyq keńsesinde ótken brıfıngte belgili boldy.
SQO Sybaılas jemqorlyqqa qarsy qyzmet mamandarynyń málimetinshe, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev memlekettik organdardyń jumysyn ońtaılandyrý arqyly shyǵyndy azaıtý bastamasyn kóterdi.
SQO-da bul másele «Qyzyljar - adaldyq alańy» jobasynyń kýratory, óńir basshysy Qumar Aqsaqalovtyń tikeleı baqylaýynda.
Oblysta memlekettik organdar men vedomstvolyq baǵynyshty uıymdardyń jumysyn ońtaılandyrý maqsatynda jergilikti atqarýshy bılik organdarynyń qyzmetine saraptama jasaldy. Nátıjesinde olardyń keıbiriniń jumysyn qaıta qurý barysynda 65,9 mln teńgeni únemdeýge bolatyndyǵy anyqtaldy.
«Bul atqarylyp jatqan jumystar azamattardyń ál-aýqatyn jaqsartýdy basymdyqqa alatyn memlekettik apparatty qurýǵa negizdelgen. Biz halyqtyń muqtajyn tyńdap qana qoımaı, estı bilýimiz kerek. Memlekettik organdarda ońtaılandyrý jumystary birtindep júrgiziledi», - deıdi bılik ókilderi.
Monıtorıng Densaýlyq saqtaý salasynda da júrgizildi. Petropavl qalasyndaǵy 5 medıtsınalyq mekemeni bir kópbeıindi aýrýhanaǵa biriktirý nátıjesinde 10,9 mln teńge únemdelmek.
Mádenıet salasynyń nysandary da qaıta qurylady. «Maǵjan Jumabaev mýzeıi», «Esil aýdanynyń tarıhı-ólketaný mýzeıi» sııaqty taǵy birneshe aýdandyq murajaılardy «Oblystyq mýzeıler birlestigine» biriktirý barysynda 249 myń bıýdjette qalady. Ońtaılandyrý jumystary aýdan ortalyqtarynda júrgizilip, bilim berý salasyn da qamtıdy.
Memlekettik organdar alyp otyrǵan nysandardy túgendeý barysyna ákimshilik kabınetter, basshylardyń demalys bólmeleri qysqartyldy. «SQO Jolaýshylar kóligi jáne avtombıl joldary basqarmasynda» 52,23 sharshy metr bos oryn anyqtalyp, 608 myń teńge, Aqqaıyń aýdany Astrahanka aýyldyq okrýginiń ákimdiginde 150 sharshy metrden bıýdjettiń 600 myń teńgesi únemdeldi.