SQO-da keshegi boranda eki júzge jýyq adam evakýatsııalandy, eki áleýmettik nysan zaqymdandy

<p>Soltústik Qazaqstan oblysynda 26 jeltoqsan kúni bolǵan boran saldarynan barlyq baǵyttaǵy joldar jabyldy. Desek te osy kúni eskertýge qaramastan jolǵa shyqqandar boldy. Qutqarýshylar qar qursaýynan 9 kólikti shyǵaryp, 194 adamdy jyly orynǵa jetkizdi, dep habarlaıdy <a href="Kazinform" target="_blank" rel="noopener">Kazinform</a>.</p>

SQO Tótenshe jaǵdaılar departamenti baspasóz qyzmetiniń málimetinshe, qar qursaýynan shyǵarylǵandardyń beseýi — bala. Qutqarylǵandar Shal aqyn aýdany Sergeevka qalasyndaǵy, Esil aýdany Pokrovka, Mamlıýt aýdanyndaǵy Mamlıýtka jáne M.Jumabaev aýdanyndaǵy Býlaevo eldi mekenderinde ornalasqan jylytý pýnktterine jetkizildi. Jergilikti atqarýshy organdar ystyq tamaqpen qamtydy. Eshqaısysyna medıtsınalyq kómektiń qajeti bolmady.

Bir táýlik ishinde 112 jedel arnasyna 1,5 myń telefon qoǵyraýy túsken.

Shal aqynda daýyl eki ǵımarattyń shatyryn julyp áketti. Onyń biri — Sergeevka qalasyndaǵy mektep-gımnazııa, ekinshshisi — «Bóbek» balabaqshasy. Mamandardyń aıtýynsha, bul kúni jeldiń ekpini sekýndyna 30 metrge deıin jetken. Balalardy úılerine aýdandyq tótenshe jaǵdaılar bólimderi jáne jergilikti atqarýshy bılik avtobýspen jetkizdi.

Zardap shekkender jáne qaza tapqandar joq.