SQO-da keler jyly úsh aýysymdyq oqytý jáne apattyq mektepter máselesi tolyq sheshiledi

<p>PETROPAVL. KAZINFORM &ndash;&nbsp; Soltústik Qazaqstan oblysynda balabaqshalar, mektepter jáne jataqhanalar salynyp jatyr. Byltyr osy maqsatqa 18 mlrd teńge jumsalǵan. Bilim berý nysandarynyń kóptep turǵyzylýy óńirdegi qordalanǵan birqatar máseleni sheshpek.</p>

ıAǵnı, 2025 jylǵa qaraı úsh aýysymdy oqytý máselesin sheship qana qoımaı, qazirgi apatty mektepterden tolyq arylýǵa, sondaı-aq 2 jastan 6 jasqa deıingi balalardy mektepke deıingi bilimmen qamtýdy ulǵaıtýǵa múmkindik beredi.

SQO qoǵamdyq keńesinde qarjy basqarmasynyń basshysy Natalıa Dyshkant byltyr bilim berý salasynda atqarylǵan jumystarǵa toqtaldy. Jalpy 2023 jyly osy salaǵa 147 mlrd 341 mln teńge bólingen. Onyń ishinde bilim berý nsyndaryn kúrdeli jóndeýge 4 mlrd 142 mln teńge, materıaldyq-tehnıkalyq bazany nyǵaıtýǵa 3 mlrd 958 mln teńge, jańa nysandardyń qurylysyna 4 mlrd 664 mln teńge jumsaldy.

«Óńirde úsh aýysymdy oqytýdy boldyrmaý úshin jyl saıyn mektep qurylysy boıynsha jobalar iske asyrylyp keledi. 2023 jyly bilim berý ınfraqurylymyn qoldaý qory esebinen Taıynsha qalasynda 600 oryndyq mektep qurylysy aıaqtaldy. Jergilikti bıýdjet qarajaty esebinen Taıynsha aýdany Vıshnevka aýylynda apatty mekteptiń ornyna 120 oryndyq mektep qurylysy aıaqtaldy. Sonymen qatar, Petropavlda 50 oryndyq jatyn korpýsy bar 300 oryndyq túzetý mektep-ınternatynyń qurylysy júrgizilip jatyr. «Jaıly mektep» ulttyq jobasyn iske asyrý aıasynda úsh jyl ishinde 2700 oqýshyǵa arnalǵan 4 jaıly mektep salynady», - dedi Natalıa Dyshkant.

Basqarma basshysynyń aıtýynsha, ótken jyly 1200 oryndyq 2 mekteptiń qurylysy bastaldy, bıyl olar tapsyrylýy qajet. Olar – Petropavldaǵy «Orman» jáne «Bereke» shaǵyn aýdandarynda salynyp jatqan 600 oryndyq mektepter. Osy maqsatqa Ulttyq qordan 4,1 mlrd teńgeden astam nysanaly transfertter bólindi.

Bıyl Taıynsha aýdanynyń Dragomırovka aýylynda apatty jaǵdaıda turǵan mekteptiń ornyna 120 oryndyq jańa mektep qurylysy bastalady. Osylaısha apattyq mektepter máselesi tolyq sheshiledi.

«Balabaqshalarǵa kezektilikti qysqartý jáne balalardy erte jastan mektepke deıingi tárbıemen jáne oqytýmen qamtamasyz etý úshin 2023 jyly 140 oryndyq balabaqsha qurylysyn bastaýǵa oblystyq bıýdjetten 222,3 mln teńge bólindi. 2024 jyly jobany aıaqtaýǵa oblys bıýdjetinde taǵy 1 mlrd 113 mln teńge qarastyrylǵan. Nátıjesinde 2025 jyldyń sońyna deıin Petropavl qalasy boıynsha 2 jastan 6 jasqa deıingi balalardy mektepke deıingi tárbıemen qamtý 77%, oblys boıynsha 93% jaqsarady», - dedi basqarma basshysy.

Jataqhanalardaǵy oryn tapshylyǵyn sheshý, sondaı-aq stýdentterge neǵurlym qolaıly jaǵdaı jasaý úshin Petropavldaǵy qyzmet kórsetý salasy kolledjiniń 244 oryndyq jataqhanasynyń qurylysy aıaqtaldy. Budan bólek 1 444 oryndyq 2 stýdenttik jataqhananyń qurylysy júrip jatyr.

«Qazirgi ýaqytta SQO-da stýdenttik jataqhanalarda 3 129 oryn qajet, onyń 2 318-i ýnıversıtet úshin, 811-i kolledjder úshin kerek. Byltyr respýblıkalyq bıýdjetten M.Qozybaev atyndaǵy Soltústik Qazaqstan ýnıversıtetine 600 oryndyq eki ǵımarattan turatyn jataqhana salýǵa 2 mlrd 262 mln teńge bólindi. Jyl qorytyndysy boıynsha qarajat tolyq ıgerildi. Jataqhanalar 2024-2025 oqý jylynyń basynda paıdalanýǵa beriledi dep josparlanyp otyr. Bıyl qurylysty aıaqtaýǵa 1 mlrd 708 mln teńge bólindi», - dedi Natalıa Dyshkant.

Buǵan deıin SQO-da byltyr 46 jasóspirim qyzdyń bosanyp, 14-iniń jasandy túsik jasatqanyn jazǵan edik.