SQO-da «Qazaq halqyna myń alǵys» atty merekelik is-shara ótti
SQO «Qoǵamdyq kelisim» KMM málimetinshe, Alǵys aıtý kúnine jáne Qazaqstan halqy Assambleıasynyń 25 jyldyq mereıtoıyna oraı uıymdastyrylǵan is-shara qazaq jerinde turatyn túrli ult ókilderiniń mádenıeti men salt-dástúrinen habardar etetin kórmeden bastaldy. Etnomádenı ortalyqtardyń ulttyq kostıým kıgen ókilderi kórermen nazaryna qoldanbaly qolóner buıymdaryn, turmystyq zattardy, zergerlik buıymdary men ulttyq taǵamdaryn usyndy. Qonaqtar tatarlardyń chak-chagynan, túrikterdiń pahlavasynan, azerbaıjandardyń jıngalynan, polıaktardyń favorkıinen dám tatty. Kórme «Qazaq halqyna myń alǵys!» dep atalǵan eken.
SQO-da elimizdegi biregeı oqý ordasy - №17 ulttyq órkendeý orta mektep-kesheni bar. Munda 22 ulttyq ókili bilim alady, olar óz tilin, mádenıet, salt-dástúrin tanyp-bilýge múmkindik alǵan. Mektep oqýshylary «ALJIR» teatrlandyrylǵan kórinisin qoıyp, qazaq balalarynyń lagerdegi áıelderdi qurtpen qalaı ashtyqtan aman alyp qalǵanyn kórsetti.
Oblystyq Qazaqstan halqy Assambleıasy bir shańyraq astyna 20-dan astam ulttyq-mádenı ortalyqty biriktirgen. Aýdandarda olardyń sany 300-ge jýyq. Bul kúni etnomádenı birlestikterdiń ókilderi sahnaǵa shyǵyp, qıyn kezeńde qushaq jaıa qarsy alǵan, barymen bólisip, qonaqjaılyq tanytqan qazaq halqyna alǵystaryn bildirdi.
«1 naýryz – qazaqstandyqtar úshin erekshe mereke. Bul kúni Qazaqstan halqy Assambleıasy qurylǵan bolatyn. Alǵys aıtý merekesiniń dál osy kúnge oraılastyrylýdynyń bir sebebi de osy», - dedi SQO Qazaqstan halqy Assambleıasy hatshylyǵynyń meńgerýshisi Muratbek Zeınýllın.
Іs-sharada qazaq halqynyń «Múshel jas» dástúri kórsetildi. Múshelden aman ótken, ómiriniń jańa kezeńine aıaq basqan adam óziniń bir kıimin izin basyp kele jatqanǵa syılap, onyń da mejeden sátti ótýin tileıdi. Osylaısha assambleıa ardagerleri, ıaǵnı etnomádenı ortalyqtardyń tóraǵalary men belsendileri – Roman Arakelov, Saǵyndyq Salmurzın, Dılıara Hasanova, Zýleıha Bıkmetova, Valerıı Evdokımenko, Muratbek Zeınýllınder assambleıanyń jastaryna shapan men qamzol syılap, urpaqtar sabaqtastyǵyn kórsetti.
Merekelik is-shara Qazaqstandy meken etken túrli ult ókilderiniń kontsertine ulasty.