SQO-da kásipker mektepti úzdik aıaqtaǵan túlekterge asyl tuqymdy sıyrdyń buzaýyn syıǵa beredi
- Qaırat Saparǵalıuly, aldymen ózińizdi tanystyryp ketińizshi...
- Men SQO Maǵjan Jumabaev aýdany Sýlyshoq aýylynda týyp, óstim. Mektepti bitirisimen Petropavldaǵy aýyl sharýashylyǵy tehnıkýmyna túsip, tehnık-mehanık mamandyǵyn alyp shyqtym. Aýyl sharýashylyǵy salasynda júrgenime 27 jyl boldy.
- Sharýashylyǵyńyz jaıynda aıtyńyzshy, bári neden bastaldy?
- Toqsanynshy jyldar bolatyn, keńsharlar quryp, erteńimiz bulyńǵyr kez. Otbasymyzǵa paıdan 76 ga jer buıyrdy, sol alqappen egin salýdy bastadyq. Qıyndyqtarǵa moıymadyq, erinbedik, bara kele basqa shaǵyn sharýashylyqtar qosyldy. Nátıjesinde «Agro-Kompleks-Sýlyshoq» JShS qurdyq. Qazir ıeligimizde 1184 ga jerimiz bar. Bıdaı, arpa, suly egemiz. Biz eginshilikpen ǵana emes, mal sharýashylyǵyn da damytyp jatyrmyz, sondyqtan jyl boıy jumys bar. Fermaǵa sımmental sıyrlardy ákeldik. Bul sútti sıyrlar. Sondaı-aq iri qara maldyń gereford tuqymy bar – etti baǵytty da damytyp jatyrmyz.
- Sýlyshoq – bolashaǵy zor eldi mekenderdiń qatarynda. Desek te kezinde ol da kóptegen qazaq aýylynyń kebin kıip, quryp ketýdiń az-aq aldynda qalǵan eken.
- Iıa, durys aıtasyz. 2017 jyly bala sanynyń azdyǵyna baılanysty mektep jabylady eken degen habar keldi. Bilmekke birden ákimdikke habarlastym. Olar bul aqparatty rastady. Sosyn ondaǵy mamandar halyqty jumys kúshi kóp óńirlerden soltústik oblystarǵa kóshiretin baǵdarlama bar ekenin aıtty. Dál sol kúni aýdanǵa jeti balasy bar bir otbasy kelipti, Býlaevtaǵy qonaqúıge túsken eken. Kólikpen baryp, otbasyny aýylǵa alyp keldim. Olarǵa aýyl unady, qalatyn boldy. Sóıtip bizdiń mekteptegi bala sany 14-ke jetti. Sol jyly sol kisilerdiń tanystary tórt balamen keldi.
2018 jyly tórt balasy bar taǵy bir otbasyny qabyldadyq. Biraq bizge bala áli de az, jabamyz dedi. Oblystyq ákimdikke baryp, sol kezdegi ákimniń orynbasary Aıdarbek Saparovqa kirip, jaǵdaıdy aıttym. 30 bala bolatyn bolsa mektep jabylmaıtyndyǵyna ýáde berdi. Men 30-ǵa jetkizetinimizdi aıttym.
2019 jyly sharýashylyq esebinen qonys aýdarýshylarǵa bes úı saldyq. Bıýdjet esebinen qosymsha 5 úı turǵyzyldy. Osylaısha bir jazda aýylda 10 jańa úı paıdalanýǵa berildi. Jaǵdaı jasalǵannan keıin otbasylar kóship kele bastady. Sodan beri aýylymyzǵa 24 otbasy qonys aýdarǵan eken. Olarǵa osy bes jyldyń ishinde 20 baspana turǵyzyldy.
Kóship kelgen erli-zaıyptylardyń ishinde muǵalimder bar, olar mektepke jumysqa ornalasty. Veterınar, elektrık, jumysshylar bar, olar sharýashylyqta jumys istep jatyr. Qazir bizde kadr tapshylyǵy joq, biraq, kóship kelgen adamǵa jumys taýyp beremiz.
- Qazirgi ýaqytta aýylda qansha turǵyn bar? Olarǵa qandaı jaǵdaı jasalǵan?
- 2017 jyly stýdenttermen qosa eseptegende Sýlyshoqta 76 adam bolǵan. Qazirgi ýaqytta 266 turǵynymyz bar. «Eńbek» baǵdarlamasymen 24 otbasy kóship keldi. Bolashaqta taǵy 10 úı salýdy josparlap otyrmyz. Qazir 50/50 baǵdarlamasy bar, shyǵynnyń jartysy memleket esebinen óteledi. Bul aldaǵy úsh jylǵa jospar.
Aýylda jumys bar. Sondaı-aq qoradaǵy malyn kóbeıtsin dep turǵyndarǵa úsh jylǵa sıyr beremin. Olar tólin ózderine alyp, sharýashylyqpen aınalysady, dál osylaısha qoı da beremin. Bul adamdardy eńbekke yntalandyrady.
Byltyr aýylda mádenıet úıin saldyq. Qazir barlyq merekelerdi osy klýbta ótkizemiz, jastarǵa bı keshteri uıymdastyrylady. Áleýmettik nysandardy ashyp jatyrmyz, munyń bári qosymsha jumys orny ǵoı. Apattyq jaǵdaıda turǵan mektepti kúrdeli jóndeýden ótkizdik. Jıhazy, ashananyń jabdyǵy jańadan alyndy. Bıyl balabaqsha qurylysy júrip jatyr, ony jyl sońyna deıin paıdalanýǵa beremiz. Medpýnkt jumys isteıdi.
Mektepti jaqsy aıaqtaǵan 9 oqýshyǵa asyl tuqymdy iri qara maldyń buzaýlaryn berdik, yntalandyryp. Bir kezderi jabylýdyń az aq aldynda qalǵan mektepke qazirgi ýaqytta bala syımaıdy, sondyqtan oqýshylar eki aýysymda oqıtyn bolǵan. Ǵımaratta sport zaly qarastyrylmaǵan. Sondyqtan aýylǵa mektep kerek. Qazir 86 bala mektepke barady, onyń 18-i – shaǵyn ortalyq tárbıelenýshileri. Aýyl ósip jatyr, mektep tar, bul máseleni kótergenimizge eki jyl boldy.
- Bul Sizge ne úshin kerek?
- Bizdiń túp qazyǵymyz – aýyl. Osy baılyǵymyzdy saqtap qalýymyz kerek. Ol úshin halyqqa jaǵdaı jasaý kerek. Qazir bizdiń aýylda, baıqasańyz, kóshe qańyrap bos jatqan joq, oınaǵan, júgirgen balany kóresiz. Bul keremet emes pe, ıaǵnı aýyldyń bolashaǵy bar. Bizdiń bes jylǵy eńbektiń nátıjesi. Aýylymyzdy saqtap qala aldyq.
- Munymen toqtap qalmaısyz ǵoı, qandaı josparlaryńyz bar?
- Alǵa qoıǵan maqsat – aýylda óndiris ornyn ashý. Shıkizat sút bar, sút jelisin ornatyp, irimshik jasaýǵa bolady. Meshit salynady, oǵan arnalǵan ýchaske de, qujattary da daıyn. Balabaqsha qurylysy aıaqtalǵannan keıin kóktemde iske kirisemiz. Memleket tarapynan da keremet qoldaý bar, aýylda bıyl úsh kóshe jóndeldi, byltyr taza sý kirgizildi.
- Rahmet!