SQO-da kásipkerdiń qoımasyn órtep, 738 mln teńge shyǵynǵa ushyratqan kúdikti eki aıǵa qamaldy

PETROPAVL. QazAqparat – Soltústik Qazaqstan oblysynda kásipkerdiń qoımasyn tuqymdyq bıdaıymen birge órtep jiberdi dep ustalǵan kúdikti eki aıǵa qamaýǵa alyndy, dep habarlaıdy QazAqparat tilshisi.

SQO oblystyq sotynyń málimetinshe, 15 mamyr kúni M. Jumabaev aýdandyq soty tergeý sýdıasynyń qaýlysymen osy aýdannyń Zolotaıa Nıva eldi mekeniniń turǵyny Aleksandr Kıntsel eki aıǵa qamaýǵa alyndy.

Oǵan A. Pozdnıakovpen aldyn ala kelisim boıynsha 5 jáne 10 mamyr kúnderi Zolotaıa Nıva aýylynda ornalasqan «Bars» sharýa-fermerlik qojalyǵynyń astyq-qabyldaý pýnktindegi qoımalardy tuqymdyq bıdaıymen órtep jiberdi degen aıyp taǵyldy.

Kelgen shyǵyn orasan – 738 mln 600 myń teńgege baǵalandy.

Aleksandr Kıntsel 1987 jyly týǵan, arnaıy orta bilimi bar, nekede turmaǵan.

Psıhıatrııalyq jáne narkologııalyq dıspanserlik esepte turmaıdy, múgedektigi joq.

Tergeý sýdıasy ótinishhat materıaldaryn zerttep, sot otyrysyna qatysýshy adamdardyń, prokýrordyń, jábirlenýshi ókilderiniń, advokattyń, qorǵaýshynyń, kúdiktiniń pikirlerin tyńdap, QR Qylmystyq-protsessýaldyq kodeksiniń 136, 138, 147, 148 baptaryn negizge alyp, eki aı merzimge qamaýda ustaý túrindegi bultartpaý sharasyna sanktsııa berdi.

Jalpy qylmystyń bul túrine bes jyldan on jylǵa deıingi merzimge bas bostandyǵynan aıyrý jazasy qarastyrylǵan.

Buǵan deıin áleýmettik jelide órtenip jatqan qoımalardyń beınejazbasy jarııalanǵan edi.