SQO-da karantındik shekteýler jeńildetilýi múmkin

PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵandar sany azaıyp keledi, óńir «qyzyl aımaqtan» shyqty, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń málimetinshe, ótken táýlikte oblysta 62 adam qaýipti vırýsty juqtyrsa, 69-y táýir boldy. KVI juqtyrǵandar sany kúnnen kúnge azaıyp keledi. Eldegi epıdemıologııalyq jaǵdaıdy baǵalaıtyn matrıtsa boıynsha óńir «qyzyl aımaqtan» shyqty.

Oblys ákimi Qumar Aqsaqalov ta jaǵdaıdy baqylaýda ustap otyr. Óńir basshysy qala ákiminiń eseptik kezdesýinde epıdemıologııalyq jaǵdaı osylaısha jalǵasatyn bolsa karantındik shekteýlerdiń jeńildetiletinin aıtty.

«Bul – der kezinde qolǵa alynǵan shekteý sharalarynyń nátıjesi. Sondaı-aq turǵyndardyń tártibiniń arqasy. Eger jaǵdaı osylaısha jalǵasatyn bolsa, jaqyn arada shekteýlerdi jeńildetemiz. Ázirge naqty ýaqytyn aıtý múmkin emes. Alaıda jaqynda keı nysandardyń demalys kúnderi jumys isteýine ruqsat berý máselesi qaralady», - dedi Qumar Aqsaqalov.

Qazir Petropavlda demalys kúnderi kóptegen nysandar jabyq. Sondaı-aq senbi-jeksenbi qoǵamdyq kólik júrmeıdi.

Jalpy SQO-da COVID-19 juqtyrǵandardyń sany 11 305 adamǵa jetti, 10 696 adam saýyqty. Qaýipti vırýs juqtyrǵan 42 adam qaıtys boldy.