SQO-da qańǵyrǵan ıtter úı qustary men maldy qyryp jatyr

PETROPAVL. QazAqparat – Soltústik Qazaqstan oblysyndaǵy Elıtnoe aýylynyń turǵyndary qańǵyrǵan ıtterden zardap shegip jatyr. Jabaıylanǵan ıtter malǵa shaýyp, qusty qyryp tastady, dep habarlaıdy QazAqparat tilshisi.

SQO Qyzyljar aýdany Elıtnoe eldi mekeniniń turǵyndary qańǵyrǵan ıtter balaǵa shaba ma, dep qorqatyn bolǵan. Aýyldyqtardyń aıtýynsha, jabaıylanǵan ıtter úıirge jınalyp, malǵa shabatyn bolǵan.

«Qańǵyrǵan ıtter jyldan jylǵa kóbeıip barady. Osy jazda kórshilerimizdiń qoradaǵy tórt qoıyn jaryp ketti.

Búgin qamaýda turǵan taýyqty ósip qalǵan 19 balapanymen jep qoıdy. Mundaı jaǵdaılar aýylda kóp. Búgin qus pen qoıǵa shapty, erteń bizdi talamasyna kim kepil. Balalarymyzdy dalaǵa jiberýge qorqatyn boldyq.

Bul jaıynda ýchaskelik polıtsııa ınspektoryna, ákimdikke habarlastyq. Gýmanızatsııa dep máseleni shesher emes», - dep aýyl turǵyndary áleýmettik jelide janaıqaıyn jetkizdi.

Qyzyljar aýdanynyń ákimdigi oqıǵaǵa qatysty túsinik berdi.

«Bıyl Qyzyljar aýdanynda qańǵyrǵan ıt-mysyqqa arnalǵan ýaqytsha ustaý pýnkti salynady. Osy maqsatqa Vıshnevka eldi mekeninde 0,5 ga ýchaske bólindi. Jobanyń eskızi jasalyp, bekitildi. Úshinshi toqsanda jumys bastalady. Keıin qańǵyrǵan ıtterdi aýlaýdy bastaımyz.

Sondaı-aq 1 qyrkúıekten bastap turǵyndar ıt-mysyqtaryn esepke qoıýy kerek ekenin eske salamyz. Bul rásim polıtsııaǵa mal ıelerine shyǵyn keltirgen ıtterdiń ıelerin anyqtaýǵa kómektesedi», - delingen jaýapta.