SQO-da qalyńdyǵy 1,5 metr toń sý tasqynyna soqtyrýy múmkin

PETROPAVL. QazAqparat - Soltústik Qazaqstan oblysynyń qutqarýshylary sý tasqynyna daıyndyq týraly aıtty, dep habarlaıdy «QazAqparat» HAA tilshisi.

Bıyl óńirde sý tasqynynyń asa qaýpi joq. Soǵan qaramastan, jerdiń ylǵaldanyp, topyraqtyń toń bolyp qatýy jaǵdaıdy qıyndatýy múmkin. Qazir tońnyń qalyńdyǵy keı jerlerde 1,5 metrge jetedi.

Soltústik Qazaqstan oblystyq tótenshe jaǵdaılar departamenti bastyǵynyń orynbasary Erik Sarybaevtyń aıtýynsha, kún jylynyp, jaýyn-shashyn kóp tússe, topyraq ylǵaldy tez sińire almaıdy. 

Keıbir eldi mekenderdegi kólderde sýdyń deńgeıi kóterilýi múmkin.

«Kóldegi sý deńgeıin 30 santımetrge tómendetý boıynsha sharalar qoldandyq. Bir santımetr - 400 myń «tekshe» sý. Bıyl alǵash ret «Qazgıdrometpen» birlesip jumys tobyn qurdyq. Jumystyń nátıjesinde tolyq kartınany kóre alamyz», - dedi E.Sarybaev.

Oblysta qar jamylǵysynyń bıiktigi 8-30 santımetr aralyǵynda.

E.Sarybaevtyń aqparaty boıynsha, qutqarýshylar kez kelgen jaǵdaıǵa daıyn. 127 eldi meken men tasjoldyń 291 ýchaskesi jiti baqylaýda. 

Illıýstratsııalyq foto