SQO-da JCI álemdik standartyna saı alǵashqy aýrýhana salynady

PETROPAVL. QazAqparat – Soltústik Qazaqstan oblysynda túrik ınvestorlary elimizde buryn bolmaǵan álemdik standartqa saı kópbeıindi aýrýhana qurylysyn bastamaq, dep habarlaıdy QazAqparat tilshisi.

Petropavlda óńir basshysy Qumar Aqsaqalov «YDA Holding» kompanııasynyń basqarma tóraǵasy Arslan Hýseınmen kelissózder ótkizdi. SQO ákimi baspasóz qyzmetiniń habarlaýynsha, túrik kompanııasy «Shyǵys» shaǵynaýdanynda kóp salaly aýrýhananyń qurylysyn bastamaq.

«Jyl boıy sizdermen kelissózder júrgizip kelemiz. Bul aýrýhana oblysqa óte qajet. Turǵyndar sapaly medıtsınalyq qyzmet alý kerek. Medıtsınalyq týrızmdy de damyta alamyz», - dedi óńir basshysy.

Aýrýhana sońǵy úlgidegi tehnologııamen qamtamasyz etilmek. 540 orynǵa shaqtalady. Onnan astam zamanaýı bólimsheler ashylady. Medıtsınalyq keshenniń janynda tikushaqqa arnalǵan qoný alańy bolady. Halyqaralyq deńgeıdegi jıyndardy ótkizý úshin bólek ǵımarat salynady. Meımanhana men dárigerlerge arnalǵan baspana turǵyzylady. Mamandardyń aıtýynsha, bul Qazaqstandaǵy JCI júıesi boıynsha salynǵan alǵashqy aýrýhana bolmaq.

«Bizde Túrkııada jáne basqa elderde jobalar kóp. Qazaqstanda 3 jobany júzege asyryp jatyrmyz. Biraq, SQO sııaqty osynsha qulshynys tanytyp, kómek kórsetken óńir bolǵan joq. SQO ákimine barynsha qoldaý bildirgeni úshin alǵysymdy jetkizemin. Biz óńir dárigerlerin ózimizde oqytýǵa ázirmiz», - dedi Arslan Hýseın.