SQO-da iz-túzsiz ketken 48 jastaǵy er adamǵa izdeý jarııalandy

PETROPAVL. QazAqparat – Soltústik Qazaqstan oblysynda 48 jastaǵy Andreı Korjanǵa izdeý jarııalandy. Habarsyz ketken ol bes kúnnen beri tabylmaı jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Petropavl turǵyny Andreı Korjan 28 aqpan kúni úıinen shyǵyp ketip, oralmaǵan. Boıy shamamen 180 sm. Ústinde jaǵasy bar qara-kók kúrteshesi, qara-kók djınsy shalbary, aıaǵynda qara etigi bolǵan.

Tártip saqshylary izdeýdeginiń júrgen jeri týraly qandaıda bir aqparat bolǵan jaǵdaıda «102» arnasyna habarlasýdy suraıdy.

«Keıbir adamdar óz josparlary týraly jaqyndaryna aıtpaı úıden ketip qalady. Mundaı jaǵdaılar jıi kezdesedi. Biri jumys izdep, basqa aımaqtarǵa jol júrýi múmkin, endi biri ishimdikke áýestenip, tanystarymen kóńil kóterýge ketedi. Olardy týystary ózdiginen izdep, nátıje bolmaǵan jaǵdaıda polıtsııaǵa júginedi», – deıdi SQO PD krımınaldyq polıtsııa basqarmasynyń bastyǵy Marat Jumalıev.

Aryz kelip túsken sátten tártip saqshylary birden izdestirý is-sharalaryn ótkizýdi bastaıdy. Birden joǵalǵandar týraly baǵdarlar barlyq polıtsııa bólinisteri men qyzmetterine taratylady.

Joǵalý sebepteri ár túrli. Olardy izdeý edáýir resýrsty qajet etedi. Bıylǵy jyldyń eki aıynda oblys boıynsha polıtsııaǵa habar-osharsyz ketkender týraly 49 ótinish kelip túsken. Olardyń barlyǵy izdestirilip, 47 adamnyń júrgeni jeri kezekshi táýlik ishinde anyqtaldy.