SQO-da ıt pen mysyqty chıpteýge bıýdjetten 2,7 mln teńge bólingen

PETROPAVL. QazAqparat – Soltústik Qazaqstan oblysynda 1 550 úı janýary esepke alyndy, onyń 963-i – ıt. Jalpy, óńirde ıesiz ıt-mysyqty aýlap, sterıldeýge, chıp salýǵa bıyl bıýdjetten 53,4 mln teńge bólinip otyr, dep habarlaıdy QazAqparat tilshisi.

SQO veterınarııa basqarmasy baspasóz qyzmetiniń málimetinshe, sáýir aıynyń basynan qańǵybas ıt-mysyqty uryqsyzdandyrý boıynsha jumys júrip jatyr. Osy aralyqta ıesiz júrgen 135 úı janýary aýlanyp, esepke alyndy, pishtirilip, chıp salyndy. Alaıda, 108-i qaıtadan kóshege jiberildi.

«Óńirde byltyrdan beri «TANBA» atty úı janýarlaryn esepke alý aqparattyq júıesi jumys isteıdi. Oǵan barlyq aýdandar men oblys ortalyǵynyń veterınarlyq stantsııasy qosylǵan. Osy aralyqta 1 550 janýar, sonyń 165-i ıesiz, esepke alyndy. Sonyń 963-i – ıt, qalǵany – mysyq», - deıdi basqarmanyń baspasóz hatshysy Amanjol Nurtazın.

Mamannyń aıtýynsha, qazirgi ýaqytta ıt-mysyqqa chıp saldyrý jumysy qyzý júrip jatyr. Bul maqsatqa oblys bıýdjetinen 2,7 mln teńge bólindi.

«Petropavl qalasynyń vetstantsııasy 1 myń chıp satyp aldy. Aýdandar da chıp alý úshin memlekettik satyp alý júrgizedi. QR Ákimshilik kodeksine sáıkes, úı janýarlaryna chıp salý talabyn oryndamaǵan turǵyndarǵa 10 AEK – 34 500 teńge mólsherinde aıyppul bar. Laýazymdy tulǵalarǵa 20 AEK – 69 myń teńge, zańdy tulǵalarǵa 30 AEK – 103 myń teńge aıyppul qarastyrylǵan», - deıdi Amanjol Nurtazın.