SQO-da ishimdikten bas tartqan aýyldar sany artyp keledi

PETROPAVL. QazAqparat – Soltústik Qazaqstan oblysynda spırttik ishimdikterden bas tartqan aýyldardyń sany artyp keledi. Olardyń qatarynda Aıyrtaý aýdanyndaǵy Qarasaı jáne Birlestik aýyldary da bar, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Aıyrtaý aýdanyndaǵy Qarasaı jáne Birlestik aýyldary alkogolden 5, 7 jyl buryn bas tartty. Eki jaǵdaıda da aqsaqaldar muryndyq bolyp, olardyń usynysyn halyq qoldady. Aýyl dúkenderiniń ıeleri de araq-sharap satpaýǵa kelisken.

Qarasaı aýylynda 263 adam turady. Munda sońǵy jyldary qylmys nemese otbasylyq daý-damaı tirkelmegen. Aryqbalyq aýyldyq okrýginiń ýchaskelik polıtsııa ınspektory Abylaıhan Ramazanov bul eldi mekende alty jyldan beri eńbek etedi. Tártip saqshysy bul aýylǵa profılaktıkalyq áńgimelesý úshin ǵana barady – aýyl turǵyndaryna ınternet-alaıaqtyq týraly aıtyp, oqýshylardyń quqyqtyq saýattylyǵyn arttyrýǵa at salysady.

Al Birlestik eldi mekeniniń 500-ge jýyq turǵyny bar. Sońǵy jyldary munda tek bir ret qana jedel tergeý toby shyqqan. Mal urlyǵy rastalmady, joǵalǵan sıyr muz jarylyp, sýǵa batyp ketken.

Eki aýylda da sport damyp keledi. Barlyq is-sharalar búginde alkogolsiz ótetin bolǵan.

«Aýyl turǵyndarynyńy alkogolden bas tartýy polıtsııaǵa úlken kómek. Tájirıbe kórsetkendeı: eldi mekenderde spırttik ishimdikti tutyný neǵurlym az bolsa, soǵurlym tynysh bolady. Aıyrtaý aýdanynyń polıtsııa bóliminde barlyǵy 22 ýchaskelik polıtsııa ınspektory jáne olardyń 6 kómekshisi qyzmet atqarady. Polıtsııa qyzmetkerleri turaqty túrde qylmys pen quqyq buzýshylyqtyń aldyn ala otyra, halyqpen senimdi seriktestik ornatqan. Endi ishimdikten bas tartqan aýyldardyń oń tájirıbesin basqa aýyldarǵa engizýdi maqsat etken», - deıdi aýdandyq polıtsııa bóliminiń bastyǵy Marat Serkeshev.