SQO-da iri qara mal teri aýrýyna shaldyqty
«SQO-da bir aýyldyń maly jappaı belgisiz dertke shaldyqty» degen aqparatty oblystyq Veterınarııa basqarmasynyń mamandary joqqa shyǵardy. Búginde aýrý tek toǵyz sıyrda tirkelgen. Onyń ózi jurt shýlaǵandaı dermatıt emes.
«Sıyrlar teriniń qabynýy aýrýyna shaldyqqan. Qazir Toqshyn eldekeninde mal dárigerleri jaǵdaıdy kúndelikti baqylap otyr. Ár úıdiń malyna dertke qarsy vaktsına egildi», - deıdi SQO Veterınarııa basqarmasy basshysynyń mindetin atqarýshy Berik Áljanov.
Oblystyq veterınarlar turǵyndardy dúrlikpeýge shaqyryp otyr. Olardyń pikirinshe, jaǵdaı aıtarlyqtaı ýshyqqan joq. Búgindegi aýyldaǵy jaǵdaı turaqtala bastaǵan.
«Mamandar laboratorııalyq zertteýlerdi ótkize almady. Sebebi emdeý barysynda malǵa antıbıotıkter qoldanylǵan. Sút qaýipsizdiginiń tehnıkalyq reglamenti boıynsha, dári berilgennen keıin sútti 14 kún paıdalanýǵa tyıym salynady. Mal ıeleri bul jaıynda eskertildi. Teri aýrýlarynyń túri kóp. Qazirgi ýaqytta naqty qaısysy ekenin aıta almaımyz», - deıdi Berik Áljanov.
Málim etilgendeı, malda aýrý belgileri paıda bolysymen-aq aýyldyq okrýgtiń mal dárigeri joǵary jaqty eskertip, saraptama jasaýǵa bıologııalyq materıal alýy tıis. Zań buzýshylyq anyqtalǵan jaǵdaıda aýyldyń mal dárigeri ákimshilik jaýapkershilikke tartylady, 125 AEK kóleminde aıyppul tóleıdi.
«Qazir qyzmettik tekseris júrip jatyr. Mal dárigeriniń juqpaly aýrýlarǵa qarsy mindetti ekpe jasaý talaptaryn buzǵandyǵy anyqtalsa zań boıynsha jaýap beredi. Maldardyń jaǵdaıyn qaraımyz, turǵyndardan olardyń maldaryna egý jumystarynyń jasalǵan-jasalmaǵandyǵyn bilemiz. Ókinishke oraı, keıde mal ıeleri ózderi ımmýndaýdan bas tartyp jatady», - deıdi QR AShM Veterınarlyq baqylaý jáne qadaǵalaý komıtetiniń oblystyq aýmaqtyq ıspektsııasynyń jetekshisi Marat Ibraev.