SQO-da ınternet-alaıaqtyqtyń jańa tásili tirkeldi

PETROPAVL. QazAqparat – Petropavl turǵyny alaıaqtardyń arbaýyna túsip 530 myń teńgesinen aıyryldy. Zeınetkerge telefon shalǵandar bul joly «bankten» emes, «ádilet departamentinen» habarlasqan eken, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 67 jastaǵy turǵynyn «quryqqa» túsirý úshin birneshe alaıaq birlese áreket etken. Olar rolderdi ózara bólisip, keıin áıeldiń 530 myń teńgege jýyq aqshasyn qoldy etti.

Zeınetkerdiń aıtýynsha, oǵan ózin Ádilet departamentiniń zańgerimin dep tanystyrǵan áıel qońyraý shalyp, uıaly baılanystyń nasharlyǵyna shaǵymdanyp, WhatsApp arqyly sóılesýdi usynǵan. Keıin tutqanyń arǵy jaǵyndaǵy «zańger» zeınetkerden qan qysymyna qarsy dárilerdi jazdyryp alǵan-almaǵanyn suraǵan.

Zeınetkerden oń jaýap alǵan soń osy allergendi preparatty jetkizýimen aınalysqan belgili bir kompanııa áshkerelengenin jáne dárini paıdalanǵandardyń barlyǵyna úlken ótemaqy beriletinin aıtqan.

Ýaqyt óte jábirlenýshige «qarjyger» men «qazynashy» habarlasqan. «Ótemaqy» alý úshin olar áıeldi «saqtandyrý», «tekserý» jáne «tranzaktsııa» sekildi operatsııalardyń aqysyn tóleý kerek dep sendirgen.

Qala turǵyny bar jınaǵany jetpegendikten, tanystarynan qaryzǵa aqsha alyp, qylmyskerlerge 69 800 teńge, 190 myń jáne 270 myń teńge aýdarǵan. Alaıaqtar munymen toqtamaı, ótemaqy somasy ulǵaıǵanyn aıtyp, taǵy 310 myń teńge suratqan.

«Tanysy qaryzǵa aqsha surap barǵan áıelge munyń alaıaqtyq ekenin aıtyp, polıtseılerge júginýge kóndirgen. Bul fakti QR Qylmystyq kodeksiniń 190-babynyń 2-bóligi «Alaıaqtyq» boıynsha sotqa deıingi tergep-tekserýlerdiń biryńǵaı tiziliminde tirkeldi, jedel-izdestirý is-sharalary júrgizilýde.

Oblys turǵyndarynan egde jastaǵy týystaryna ınternet-alaıaqtyq jaıynda aqparat berýdi suraımyz. Óıtkeni ınternet alaıaqtyq negizinen zeınet jasyndaǵylarǵa baǵyttalǵan.

Beıtanys adamdardyń qońyraýlaryna senbeńizder. Eger qarjymen baılanysty suraqtar qoıa bastasa, alynǵan aqparatty dereý birneshe márte tekserińizder. Áńgime barysynda atalǵan uıymdarǵa qońyraý shalyńyz jáne mundaı qyzmetkerlerdiń shynymen jumys isteıtindigin, aktsııalar ótkizilip jatqanyn tekserińiz», - deıdi SQO PD krımınaldyq polıtsııa basqarmasynyń bastyǵy Marat Jumalıev.