SQO-da ınternet-alaıaqtyq arqyly 200 mln teńge shyǵyn ákelgen qylmystyq top ustaldy
QR Іshki ister mınıstri Marat Ahmetjanov SQO turǵyndarymen kezdesý barysynda ınternet-alaıaqtyq qylmysyna toqtaldy. Jyl saıyn qylmyskerler el azamattaryn 10 mlrd teńge shamasynda shyǵynǵa batyryp keledi. Ári qylmystyń bul túri jyldan-jylǵa artyp keledi. Máselen 5 jyl buryn respýblıka boıynsha osyndaı 4 myń qylmys tirkelse, bıyl onyń sany 17,5 myńǵa jetken.
«Sizderdiń óńirlerińizde jyl basynan beri 649 ınternet alaıaqtyq qylmysy jasaldy. Bul ótken jylmen salystyrǵanda 7 % kóp.
«Petropavl turǵyny 13 adamnyń atyna 2 mln teńge onlaın-nesıe alǵan. Taǵy bireýi jalǵan habarlandyrý arqyly 50 turǵyndy aldap, olardyń 3 mln teńgesin qaltasyna basqan», - dedi Marat Ahmetjanov.
Bıyl SQO-da sondaı-aq ınternet-alaıaqtyqpen aınalysyp kelgen uıymdasqan qylmystyq top áshkere boldy.
«Qylmystyq topty Petropavl turǵyny uıymdastyrǵan. Osy qalanyń ǵana emes, Astana turǵyndaryn da quryqtaryna túsirgen. Barlyǵy ustaldy, tórteýi ızolıatorda otyr.
Olar 50 dropper arqyly urlanǵan aqshany kóptegen bank esepshottary arqyly sheship otyrǵan. Ár operatsııaǵa qyzmetteri úshin 50 myń teńge tólegen. Jalpy shyǵyn – 200 mln teńge», - dedi Marat Ahmetjanov.
Іshki ister mınıstri turǵyndardy qaýipsizdikti esten shyǵarmaýǵa shaqyrdy.
«Іshki ister organdarynyń nemese bank qyzmetkeri bolyp habarlasyp, qarajatqa qatysty qandaı da bir nusqaý berse, ony oryndaýǵa bolmaıdy. Jeke málimetterińizdi, sonyń ishinde kartanyń rekvızıtteri eshkimge aıtpańyzdar. Kúdikti saýda boıynsha aldyn ala tólem jasamaǵan jón. Bireýler jibergen siltemelerge ótýge bolmaıdy, sondaı-aq paroldi únemi aýystyryp otyrýdy ádetke aınaldyrǵan durys», - dedi Іshki ister mınıstri.
Polıtsııa qylmystyń bul túrin ashýǵa erekshe mán bermek. Qazirgi ýaqytta ınternet alaıaqtyq qylmysqa jaýapkershilikti kúsheıtý máselesi qaralyp jatyr.