SQO-da ıdeologııa turǵysynda ataýy eskirgen 33 aýyl, 270-ke jýyq kóshe bar

PETROPAVL. QazAqparat – Soltústik Qazaqstan oblysynda 13 aýyldyq okrýg, 33 aýyl men 270-ke jýyq kóshe ataýyn ózgertý qajet. Olar ıdeologııalyq jaǵynan eskirip, totalıtarlyq sıpatqa ıe, dep habarlaıdy QazAqparat tilshisi.

SQO Mádenıet, tilderdi damytý jáne arhıv isi basqarmasy basshysynyń orynbasary Sáken Shákeev «Mıras» qoǵamdyq keńesiniń otyrysynda óńirde onomastıka baǵytynda birtalaı jumystyń atqarylǵanyn aıtty.

«Umyt bola bastaǵan eldi mekenderdiń tarıhı ataýlaryn qaıtarý, ataýy burmalanǵan aýyldardyń transkrıptsııasyn durystaý jáne kósheler, bilim, mádenıet, sport ordalaryna laıyqty tulǵalardyń esimderin berý – onomastıka jumysyndaǵy negizgi baǵyttar. Byltyr óńirde 2 aýyldyq okrýg, 3 aýyl qaıta ataldy. Sonymen qatar 400-ge jýyq kósheni qaıta ataý boıynsha jumys júrgizildi.

Bıyl sáýir aıynda Petropavldaǵy № 25 jalpy bilim beretin orta mektepke Álıhan Bókeıhannyń, № 2 orta mektepke Smaǵul Sádýaqasulynyń, № 9 orta mektepke Ahmet Baıtursynulynyń, Ulttyq sport túrlerinen oblystyq balalar men jasóspirimder sport mektebine Qajymuqannyń esimi berildi», - deıdi Sáken Shákeev.

Sondaı-aq bıyl Jambyl aýdanynyń ortalyqtandyrylǵan kitaphana júıesine Safýan Shaımerdenovtiń, Shal aqyn aýdanynyń qazaq orta mektebine Kákimbek Salyqovtyń, Qyzyljar aýdany Novonıkolskoe orta mektebine Gennadıı Zenchenkonyń esimderin berý týraly QR Úkimetiniń qaýlysy shyqty.

Qazirgi ýaqytta Joǵary medıtsına kolledjine Jumaǵalı Tileýlınniń, oblys ortalyǵyndaǵy № 32 orta mektepke Sábıt Muqanovtyń esimin berý týraly usynystar respýblıkalyq onomastıka komıssııasynyń qaraýyna joldandy.

«Búgingi kúni SQO-da ıdeologııalyq turǵyda eskirgen, totalıtarlyq sıpattaǵy ataýlarǵa 13 aýyldyq okrýg, 33 aýyl, 270-ke jýyq kóshe ıe.

Osyǵan oraı jumys toby qurylyp, áleýmettik tapsyrys aıasynda onomastıka baǵytynda túsindirý jumystaryn júrgizdi. Olar oblystyń barlyq aýdandaryna shyǵyp, turǵyndarmen kezdesýler uıymdastyrdy. Quramyna sózi ótimdi, tanymal azamattar kirdi», - deıdi Sáken Shákeev.

«Qazaq tili» qoǵamynyń músheleri de oblys aýmaǵyndaǵy 25 aýyldy aralap, onomastıka máselesine qatysty kezdesýler ótkizdi. Qoǵam fılıalynyń tóraǵasy Janat Muhamedjanovtyń aıtýynsha, Qyzyljar aýdanyndaǵy Chapaev, Esil aýdanyndaǵy Sovetskoe, Taıynsha aýdanyndaǵy Kellerovka, Ilıchevka aýyldarynyń turǵyndary eldi-mekenderiniń ataýlaryn qazaqshalaýǵa kelisti.

«Odan ary qaraı aýyldyq okrýgtiń ákimi jumys júrgizýi kerek edi. Jınalys ótkizý qajenttigin aıtyp usynys hat ta jazdyq. Alaıda áli jınalys ótkizilmegen. Eshqandaı jumys atqarylyp jatqan joq. Ákimdiktegiler bir-birine silteıdi», - deıdi Janat Muhamedjanov.