SQO-da gaz quıý stansasynda ballon jarylyp, bir adam aýyr jaraqat aldy

PETROPAVL. QazAqparat – Soltústik Qazaqstan oblysy Esil aýdanyndaǵy gaz quıý stansasynda 5 lıtrlik gaz ballony jarylyp, osy ortalyqtyń jumysshysy, er adam kúıik aldy, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, 11 aqpan kúni saǵat 14.32 mınýt ketkende «101» qyzmetine Esil aýdany ıAvlenka eldi mekeni, Ibraev, 75 mekenjaıynda órt shyqqandyǵy týraly habar túsken. Órt sóndirýshiler jetkende «Alys Gaz» JShS-niń operatory otyratyn ǵımaraty kók tútinge oranǵan eken.

«ıAvlenka eldi mekenindegi gaz quıý stansasynyń 42 jastaǵy jumysshysy 5 lıtrlik gaz ballonyn daladan ishke kirgizip, jylytý batareıasynyń janyna qoıǵan. Ol birazdan keıin ashylyp ketip, jarylǵan. Arty órtke ulasqan. Gaz ballony gaz mólsherin ólsheý úshin qoldanylǵan eken», - deıdi Esil aýdandyq tótenshe jaǵdaılar bóliminiń bastyǵy Juldyz Esenǵazın.

Saldarynan er adamnyń denesiniń 90 paıyzyn kúıik shaldy. Mamandardyń aıtýynsha, qazir jaǵdaıy aýyr. Jansaqtaý bóliminde jatyr.

Órtten ǵımarattyń shatyry tolyq janyp ketti, qabyrǵalaryna, esik, terezesine jáne jıhazǵa zaqym keldi.

«Órt saǵat 15.03-te tolyq sóndirildi. Osy derekke qatysty Tótenshe jaǵdaılar bólimi qylmystyq is qozǵady», - deıdi Juldyz Esenǵazın.

Foto: SQO TJD baspasóz qyzmeti