SQO-da esirtkimen ustalǵan jasóspirim 5 jylǵa sottaldy

<p>PETROPAVL. KAZINFORM &ndash; Soltústik Qazaqstan oblysynda 17 jastaǵy jasóspirim jigit 5 jylǵa bas bostandyǵynan aıyryldy. Ol esirtki satýmen aınalysatyn ınternet-dúkenge jumys istep kelgen.</p>

SQO polıtsııa departamenti baspasóz qyzmetiniń málimetinshe, «jeńil aqsha» tappaq bolǵan jasóspirim Petropavldaǵy kolledjderdiń birinde oqyǵan. Ony esirtki qylmysyna qarsy is-qımyl basqarmasynyń qyzmetkerleri ótken jyldyń qarasha aıynda ustady. Jeke tintý kezinde jasóspirimnen salmaǵy 50 gr bolatyn asa iri kólemdegi «α-PvP» esirtkisi tárkilendi.

Foto: SQO polıtsııa departamenti baspasóz qyzmeti

Ustalǵan bozbala tergeý barysynda barlyq suraqtarǵa belsendi jaýap berip otyrdy. Bıyl sáýir aıynda úkim shyǵarylǵan kezde ol 18 jasqa tolmaǵan edi. Osyny eskere otyryp, sot jazany qysqartý týraly sheshim shyǵardy. Soǵan qaramastan, jigit jastyq shaǵynyń 5 jylyn bas bostandyǵynan aıyrý oryndarynda ótkizedi. Úkim zańdy kúshine endi.

Foto: SQO polıtsııa departamenti baspasóz qyzmeti

«Ótken jyly esritki taratyp-jasyrǵan kámeletke tolmaǵan bes jasóspirim ustaldy. Orta eseppen esirtki jasyrýshylar úsh aı shamasynda ǵana jumys istep úlgeredi. Asa iri kólemde esirtki taratyp-jasyrǵandarǵa zańnamamen 15 jylǵa deıin bas bostandyǵynan aıyrý jazasy kózdelgen», - deıdi SQO PD esirtki qylmysyna qarsy is-qımyl basqarmasy bastyǵynyń mindetin atqarýshy Rýslan Úmbetov.

Buǵan deıin SQO-da aýyl turǵynynyń qorasyna kirip ketken túlkiden qutyrma aýrýy anyqtalǵanyn aıtqan edik.