SQO-da Esil ózeniniń sý deńgeıi kóterilip jatyr

<p>PETROPAVL. KAZINFORM &ndash; Soltústik Qazaqstan oblysynda Esil ózeniniń sýy kóterilip, Sergeev sý qoımasynda bóget jotasynan tasyp tógilý 4 sm jetti.</p>

Óńirge tán emes erekshe qubylysty turǵyndar baıqap, áleýmettik jelige salyp jatyr. Máselen Ǵ.Músirepov atyndaǵy aýdanda Esil ózeni kópirdi shaıyp ketken. Saldarynan aýyldardy jalǵanan kópirmen ótý búginde múmkin emes. Turǵyndar qysta sonshama sýdyń qaıdan kelip jatqanyna ań-tań.

Sergeev sý qoımasynda da Esil ózeni tasyp jatyr. Bógettiń erneýinen asqan sýdyń deńgeıi 5 sm-ge jetti. 

«Qazgıdromet» RMK SQO fılıalynyń málimetinshe, Esil ózeninde ornalasqan gıdrologııalyq beketterde 2023 jylǵy mánnen 45-75 sm asatyn sý deńgeıi belgilenedi.

— Búgin 3 jeltoqsanda Toqsan bı aýylynyń mańyndaǵy gıdrologııalyq bekette Esil ózeniniń deńgeıi 303 sm, bul ótken jylǵy mánnen 55 sm joǵary. Pokrovka eldi mekeniniń mańynda sý deńgeıi 140 sm, bul ótken jylǵy mánnen 48 sm joǵary. Petropavl qalasynyń mańynda Esil ózeniniń deńgeıi 273 sm, bul ótken jylǵydan 46 sm artyq. Sergeevka sý qoımasynda sý deńgeıi 804 sm, bul ótken jylǵy mánnen 75 sm joǵary, 2023 jyly deńgeıi 729 sm boldy. Bógettiń jotasy arqyly tasyp tógilý deńgeıi 4 sm. Sý qoımasy búginde 101% tolyq, — deıdi fılıal dırektory Qymbat Merǵalımova.

Mamannyń aıtýynsha, osyǵan uqsas jaǵdaı 2019 jyly baıqalǵan. Bógettiń jotasy arqyly tasyp tógilýi sol jyly 12 qarashada aıaqtalǵan.

— Korneevka eldi mekeni mańyndaǵy Úlken Torańǵul kólindegi gıdrologııalyq bekette sý deńgeıi 333 sm kórsetti, ótken jylǵy mánmen salystyrsaq 69 sm artyq. Ózen-kólderde qazirgi ýaqytta sýdyń mol bolýy kóktemdegi úlken sý tasqynymen, jazdyń jańbyrly jáne jer asty sýlarynyń kóterilýimen baılanysty, — deıdi Qymbat Merǵalımova.

Buǵan deıin Petropavlda tasqynnan zaqym kelgen sorǵy stansasy 4 metrlik gabıonmen nyǵaıtylyp jatqanyn jazǵan edik.