SQO-da esirtki saýdalap, mol paıdaǵa kenelmek bolǵan 30 adam bas bostandyǵynan aıyryldy
SQO polıtsııa departamenti baspasóz qyzmetiniń málimetinshe, jaqynda Petropavldyń 24 jastaǵy eki turǵynyna qatysty sot úkimi zańdy kúshine endi.
Olardyń bireýiniń qylmystyq áreketi bir aıǵa jýyq jalǵasqan. Ustaý kezinde polıtseıler kúdiktiden turǵylyqty jeri boıynsha «tuz» ataýymen belgili 17 túıinshekke salynǵan sıntetıkalyq esirtkini tárkiledi. Jigit endi aldaǵy 10 jylyn túrmede ótkizedi, apellıatsııaǵa júgingenimen sot úkimin ózgertken joq.
Ekinshisinen «tuz» dep atalatyn esirtki salynǵan 174 túıinshek tárkilendi, ol kinásin birden moıyndady. Esirtki taratýshylardy jumysqa qabyldaý týraly habarlandyrýdy jigit ınternetten kórgen. Qomaqty, ári ońaı aqshaǵa qyzyǵyp, tyıym salynǵan zattardy taratýǵa kelisken. Alaıda, 2,5 aı boıy «jumys» istep, úlken tabysqa qol jetkizbegen, bul áreketi tek 10 jylǵa bas bostandyǵynan aıyrý jazasyna ákelip soqty.
«Keı jigitter qylmystyq jaýapkershilikke tek «esirtkini salyp ketýshiler» ǵana tartylady dep oılaıdy. Olar ınternette esirtki satatyn dúkenderdi ashyp, sıntetıkalyq esirtkilerdi jasaýmen aınalysady. Bul da zańǵa qaıshy. Bıyl oblysta osyndaı ınternet-dúkendi uıymdastyrǵany úshin 7 adam sottaldy», - deıdi SQO Polıtsııa departamenti Esirtki qylmysyna qarsy is-qımyl basqarmasynyń bastyǵy Ivan Terzıdı.
Polıtseıler jastardy qylmystyq árekettiń saldaryn eskerip, jeńil tabys úshin taǵdyrlaryn nemquraıly qaramaýǵa shaqyrady. Sıntetıkalyq esirtkiler dene jáne psıhıkalyq densaýlyqty basqa esirtkilermen salystyrǵanda jyldam buzady.
Jyl basynan SQO-da polıtseıler esirtki zatynyń zańsyz aınalymynyń 204 faktisin anyqtady, onyń ishindegi 70-si satý deregi. 411 kg túrli esirtki tárkilendi, onyń 2 kg 200 gramy sıntetıkalyq esirtki.