SQO-da Esil ózeniniń sý deńgeıi bir táýlikte birden 4,5 metrge kóterildi

PETROPAVL. QazAqparat – Soltústik Qazaqstan oblysynda ózenderdiń sýy kóterilip jatyr. Keshe tası bastaǵan Sergeev sý qoımasynyń erneýinen asqan sýdyń bıiktigi búgin bir metrden asty, dep habarlaıdy QazAqparat tilshisi.

«Qazgıdromet» RMK SQO fılıalynyń málimetinshe, Sergeev sý qoımasynyń erneýinen tasyp aqqan sýdyń bıiktigi búgin tańǵy saǵat 8.00-de 102 sm-ge jetti. Keshe, 5 sáýirde onyń bıiktigi 5 sm bolǵan.

Sý áli de kelip jatyr. Máselen Sergeevka qalasynyń janynda Esil ózeniniń deńgeıi bir táýlikte 294 sm kóterildi. Al Kreşenko eldi mekeniniń mańynda ózenniń sý deńgeıi 4,5 metrge joǵarylaǵan. Osylaısha 1365 sm qurap, qaýipti deńgeı – 1400 sm-ge jaqyndap qaldy. Sý ózen arnasynan shyǵyp, jaıylyp jatyr.

Aqanburlyq ózeniniń de sýy molaıdy. Vozvyshenka eldi mekeni mańyndaǵy gıdrologııalyq bekette mamandar sý deńgeıiniń bir táýlikte 295 sm kóterilgenin anyqtady.

Rýzaevka eldi mekeni mańynda Sharyq ózeniniń de sý deńgeıi 97 sm kóterildi. Bul eki ózende de muz jarylyp, seń júrip jatyr.

Úlken Torańǵul kólinen ázirge keler qaýip joq. Gıdrologııalyq bekette mamandar sýdyń deńgeıin baqylaýda ustap otyr, ózgeris bolmashy, 1 sm ǵana kóterildi.

SQO Tótenshe jaǵdaılar departamenti baspasóz qyzmetiniń málimetinshe, 5 sáýir kúni saǵat 17.56-da erigen qar sýy Rýzaevka eldi mekeniniń mańynda «Kókshetaý-Rýzaevka» avtojolynyń 191 shaqyrymyn shaıyp ketti. Saǵat 22.00 shamasynda sýdyń jolǵa shyǵýy toqtady.

Sondaı-aq Toqsan bı eldi mekeniniń mańynda saǵat 18.00 shamasynda «Ekatenırbýrg-Almaty» avtojolynyń 41 metrin sý basty. Saǵat 00.20-da sýdyń jaıylýy toqtady.

Mamandardyń aıtýynsha, bul jerlerge arnaıy belgiler qoıylyp, qazir kezekshilik uıymdastyrylǵan.