SQO-da erigen qar sýy joldy basyp qaldy

PETROPAVL. QazAqparat – Soltústik Qazaqstan oblysynda tótenshe jaǵdaılar departamenti kúnniń jylynyp, jańbyrdyń jaýýyna baılanysty sý tasqynynyń bolý qaýpin aıtyp, aldyn ala eskertý jarııalady, dep habarlaıdy QazAqparat tilshisi.

SQO TJD baspasóz qyzmetiniń málimetinshe, 9-11 sáýir kúnderi oblys aýmaǵynda aýa temperatýrasy kóteriledi. Jańbyr jaýýy múmkin. Bul qardyń qarqyndy erýine ákeledi. Erigen qar sýynyń aǵyndylary paıda bolyp, ózen-kólderde sý deńgeıi kóterilmek.

«Qardyń qarqyndy erýine baılanysty saqtyq sharalaryn qolǵa alýdy suraımyz. Tótenshe jaǵdaı týyndaǵanda nemese qaýip tóngende sizderdiń táýlik boıy 112 telefon nómirine habarlasa alatyndaryńyzdy eske salamyz», - deıdi SQO TJD mamandary.

Erigen qar sýy óńirdegi Pokrovka-Gornoe-Antonovka baǵytyndaǵy oblystyq

mańyzy bar avtomobıl jolynyń ústinen ótip ketti. Esil aýdany Gornoe eldi mekeniniń mańynda úlken kólge aınalǵan qar sýy avtojoldyń boıyndaǵysý ótkizgish qubyrlar arqyly aǵyp úlgermeı jatyr.

«Qazgıdromet» RMK SQOF málimetinshe, oblystaǵy ózenderdiń sýy birtindep kóterilip keledi. Máselen, Gýsakovka eldimekeniniń mańynda Babyqburlyq ózeniniń deńgeıi shamamen bir táýliktiń ishinde 26 sm ózgergen. Sharyq ózeni Rýzaevka eldi mekeniniń mańynda 47 sm kóterilgen.