SQO-da «Eńbek» baǵdarlamasy aıasynda 14 myń adam jumysqa turdy

PETROPAVL. QazAqparat – Soltústik Qazaqstan oblysynda 2017-2021 jyldarǵa arnalǵan «Eńbek» baǵdarlamasynyń júzege asyrylýy ákimdik otyrysynda talqylandy, dep habarlaıdy QazAqparat tilshisi.

«Eńbek» memlekettik baǵdarlamasynyń maqsaty – ózin-ózi qamtyp otyrǵandardyń sanyn azaıtyp, turaqty jumysqa ornalastyrý. Turǵyndardy bıznes negizdermen tanystyryp, jańa kásip ashýyna kómektesý.

SQO ákimi baspasóz qyzmetiniń málimetinshe, «Eńbek» baǵdarlamasyna óńirden bıyl 17,5 myń adam qatysqan. 14 adam jumyspen qamtyldy, onyń 9 myńy turaqty jumysqa ornalasty. Kásipkerlikke 2 myńnan asa adam oqyp jatyr. Óńirde jeke kásipkerlerdiń de úlesi artty, bıyl olardyń sany 3200 adamǵa kóbeıdi.

«Óz-ózin qamtamasyz etkenderdi azaıtý, jańa jumys oryndaryn ashý jáne bıznesti damytý – bizdiń basty maqsattarymyzdyń biri. Bıyl jeke kásipkerler kóbeıdi. Olar nesıe alyp, kásipterin ashty. Osy jumysty jalǵastyrý kerek», - dedi SQO ákimi Qumar Aqsaqalov.

Baǵdarlama aıasynda kásip asham deıtinderge jeńil shartpen nesıe beriledi. 500 myńnan 6 mln deıingi teńgeni nebary 6% 7 jylǵa deıin alýǵa bolady. Alaıda bul múmkindikti shalǵaı aýyldarda qoldanyp jatqandar az.

«Turǵyndar arasynda «memlekettik baǵdarlamalarǵa qatysý úshin býma-býma anyqtama men qushaq-qushaq qujat jınaý qajet» degen pikir qalyptasty. Chol sebepti túsindirý jumystaryn meılinshe jandandyrý qajet. Ári baǵdarlamaǵa qatysý úshin ótinishti elektrondy berý múmkindigin qarastyrý kerek», - deıdi óńir basshysy.

SQO Kásipkerlik jáne týrızm basqarmasynyń málimetinshe, oblysta qazir 31 myńnan astam kásipkerlik nysany bar. Bul ótken jylmen salystyrǵanda 8% artyq. Shaǵyn jáne orta bızneste bıyl jumys oryndarynyń sany 105,3 myńǵa jetti. Negizinen fermerlik sharýashylyqtardyń esebinen ósken.