SQO-da Eńbek aýylynyń turǵyndary Golovkınge erekshe qoldaý kórsetti

PETROPAVL. QazAqparat – Soltústik Qazaqstan oblysy Eńbek aýylynyń turǵyndaryna qoı qyrqý kúzgi naýqany Golovkınniń judyryqtasýyn tamashalaýǵa kedergi bolmady, dep habarlaıdy QazAqparat tilshisi.

SQO-nyń jergilikti pablıkteriniń birinde qyzyqty beınejazba tarady.

Rolık avtorynyń aıtýynsha, Shal aqyn aýdany Eńbek aýylynyń turǵyndary Gennadıı Golovkınniń jankúıerleri. Biraq qazir óńirde qoı qyrqý naýqany qyzý júrip jatyr. Turǵyndar ashyq, jyly kúnderdi paıdalanyp qalmaq. Sol sebepti jeksenbide tańerteń bolǵan súıikti boksshylarynyń oıynyn qur jibermeý úshin olar teledıdardy dalaǵa shyǵaryp, Gennadııge de qoldaý bildirdi, qoılaryn da qyryqty. Tipti bir sát qaıshylaryn qoıyp, tik turyp, gımndi de qosyla shyrqady.

Jalpy Petropavlda Golovkın men Kanelonyń judyryqtasýyn «QYZYLJAR» art-ortalyǵynda tikeleı efırden tamashalaýǵa múmkindik jasaldy. Sondaı-aq jankúıerler arasynda Golovkınge qoldaý kórsetken úzdik beınejazbaǵa, fotoǵa baıqaý uıymdastyryldy. Birinshi oryn alǵanǵa boksshy qolǵaby, ekinshi orynǵa arnaıy sportshy bınty, úshinshi orynǵa sekirgish júldege tigildi. Biraq, uıymdastyrýshylardyń aıtýynsha, baıqaýǵa qatysýǵa tilek bildirýshiler bolmaǵan.

Osyǵan deıin «GGG-Kanelo» trılogııasyna núkte qoıylǵany týraly jazdyq.

Vıdeodan alynǵan kadr