SQO-da elge eńbegi sińgen bir top azamat marapattaldy
SQO ákimi baspasóz qyzmetinen habarlaǵandaı, jınalysta óńirdiń 28 jylda qol jetkizgen jetistikteri saralandy. SQO barlyq salalarda bıik belesterdi baǵyndyrdy.
«Qazaqstannyń 30 jyldaǵy ekonomıkalyq damýyn saralap otyryp, aýqymdy jumystardyń atqarylǵanyn kórýge bolady. Osyny saqtap, eseleý bizge amanat. 1991 jyldan beri astyq kólemi 2 esege ulǵaıdy. Táýelsizdik jyldary oblysta 3 mln sharshy metrden astam baspana berildi. Óńirdi damytýǵa arnalǵan jospar da óz jemisin berýde», - dedi oblys ákimi Qumar Aqsaqalov.
Saltanatty jıynda elge eńbegi sińgen bir top azamat marapatqa ıe boldy. Solardyń biri – Ǵabıt Músirepov atyndaǵy aýdannyń «Aqseleý» JShS dırektory Serik Malaev. «Parasat» ordenin keýdesine taqqan kásipker 31 jyl boıy osy sharýashylyqty basqaryp keledi. Ol 300 mln teńgege syıymdylyǵy 5 myń tonna bolatyn elevator saldy. Bıyl bıoqazandyqty iske qosyp, turǵyn úıler men óndiristik nysandardy ortalyqtandyrylǵan jylytý júıesine qosty. Memlekettik baǵdarlama aıasynda ońtústik óńirlerden qonys aýdarýshylarǵa 10 jańa baspana turǵyzyp jatyr.
Al Taıynsha kópsalaly aýdanaralyq aýrýhanasynyń bas dárigeri Anatolıı Rafalskıı «Qurmet» ordenimen marapattaldy. 30 jyldan artyq medıtsına salasynda eńbek etip kele jatqan dáriger Taıynshadaǵy aýrýhanany óńirdegi úzdik emdeý mekemeleriniń qataryna qosa bildi. Bıyl munda kompıýterlik tomograf alynyp, ınsýlt ortalyǵy ashyldy. Sondaı-aq pallıatıvti kómek kórsetetin bólimshe jumys isteıdi.