SQO-da elevatorda 36 jastaǵy jumysshy mert boldy

PETROPAVL. QazAqparat – Soltústik Qazaqstan oblysy Novoıshımskoe eldimekenindegi elevatorda 36 jastaǵy jumysshy qaza tapty, qazir osy iske baılanysty tergeý júrip jatyr, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 9 aqpan kúni Ǵ. Músirepov atyndaǵy aýdannyń polıtsııa bólimine shamamen saǵat 16.00-de Novoıshımskoe aýylynyń «AqNanSever» JShS elevatorynan oqys oqıǵa jaıynda habarlama túsedi.

Dándi daqyldardy saqtaýǵa arnalǵan metall sılosty tazalaý kezinde shuńqyr paıda bolyp, 36 jastaǵy jumysshy shuńqyrǵa qulap mert bolǵan.

Onyń denesi shamamen saǵat 23.00-de syrtqa shyǵaryldy.

Jedel-tergeý toby oqıǵa ornyn qarap, kýágerlerden jaýap aldy.

Óndiriste qaza bolý faktisi Sotqa deıingi tergep-tekserýdiń biryńǵaı tizilimine «Eńbekti qorǵaý qaǵıdalaryn buzý» baby boıynsha engizildi.

«Oqıǵany tolyq jáne obektıvti anyqtaýǵa baǵyttalǵan tergeý júrgizilip jatyr. Aýyl sharýashylyq qurylymdarynyń basshylary men jaýapty tulǵalardy adam ómiri men densaýlyǵyna qaýip tóndiretin jumystardy zańnamany qatań saqtaı otyra júrgizý qajettigi týraly eskertemiz», - dedi Ǵ.Músirepov aýdandyq polıtsııa bóliminiń bastyǵy Marat Áljanov.