SQO-da elektr qýatyna qaryzy barlardy páterinen aıyrmaq
«Soltústikqazenergo» AQ baspasóz qyzmetiniń ókilderi júzdegen myń teńge qaryzy barlarǵa osy sharany qoldanýǵa májbúr bolyp otyrǵanyn aıtady.
«Baspanasy saýdaǵa shyǵarylyp jatqandardyń qaryzy qomaqty - júzdegen myń teńge qaryzy bar. Qyzmettiń aqysyn der kezinde tólep otyrǵandarǵa aıtar ýájimiz joq. Qaryzyn tóleýden barynsha jaltaryp júrgendermen qatań jumys júrgizemiz. Bıyl jeke sot oryndaýshylary taǵy da 120 boryshkerdiń múlkin saýdaǵa shyǵarýǵa daıyn», - deıdi «SoltústikQazEnergo» JShS bas dırektorynyń mindetin atqarýshy Maǵaýııa Saǵyndyqov.
Jyl basynan beri 1,4 myńnan astam boryshker jaryqsyz qaldy. Sot jalpy quny 40,6 mıllıon teńge bolatyn 367 sheshim shyǵardy. Jalpy somasy 60,6 mıllıon teńge bolatyn taǵy da 432 talap-aryz qaralyp jatyr.
«Sottyń sheshimin oryndaý úshin jeke sot oryndaýshylary boryshkerdiń múlkin «qamaýǵa alady», qaryzyn jalaqysynan ustap qalady. Sharalar nátıje bermese, sotqa qaryzdy tóletýdiń basqa amalyn qaraýǵa usynys bildiredi. Ondaı jaǵdaılarda turmystyq tehnıkalar, avtomobıl, tipti páterdiń ózi de saýdaǵa shyǵarylýy múmkin. Bıyl mundaı tásil bir avtomobıl ıesi men bes páter ıesine qatysty qoldanyldy. Múlkinen aıyrylǵysy kelmegenderdiń úsheýi jalpy 9 mıllıonnan astam qarajat taýyp berdi», - deıdi baspasóz qyzmetiniń ókilderi.
Kompanııa basshysynyń málimdeýinshe, qarjylyq jaǵdaıy qıyn turǵyndarǵa basqa da tásilder qoldanylmaq. Atap aıtqanda, olardyń shamasy jeterlikteı etip qaryzdy tóleý kestesin jasaý usynylyp otyr.