SQO-da eldi mekenderden 570 myń tekshe metr qar shyǵaryldy

PETROPAVL. QazAqparat – Soltústik Qazaqstan oblysy aýmaǵynda sý tasqyny bolǵan kezde jedel áreket etetin tótenshe jaǵdaılar departamenti kúsh-quraldarynyń ázirligi qaraldy, dep habarlaıdy QazAqparat tilshisi.

SQO TJD baspasóz qyzmetiniń málimetinshe, is-shara Petropavlda ótti.

Departament bastyǵynyń orynbasary Murat Qanǵojınov qurylymdyq bólimsheler komandırleriniń sý tasqynyna daıyndyǵy týraly baıandamalaryn tyńdady.

Tehnıkanyń, jabdyq pen jaraqtyń jınaqtylyǵy men jaramdylyǵyna, onyń parametrleriniń sáıkestigine nazar aýdardy.

«Jedel áreket etý tobyna «Órt sóndirý jáne avarııalyq-qutqarý jumystary qyzmeti» MM bólimsheleri qyzmetkerleri, onyń ishinde departamenttiń jedel-qutqarý jasaǵy kirdi. Olar bolǵan jaǵdaıda aýdandyq bólimshelerge kómek kórsetýge jiberiledi. Quramyna 152 maman kirgen. Olardyń 26 tehnıkasy, 40-tan astam sorǵy jáne motopompalary, 7 sýda júzý quraly bar. Sý tasqyny bolǵan jaǵdaıda olar qajet bolǵan jerge jedel barýǵa daıyn», - deıdi SQO TJD bastyǵynyń orynbasary.

Murat Qanǵojınov óńir turǵyndaryn da óz aýlalarynan erigen qar sýynyń kedergisiz ótýin qamtamasyz etý qajettigin eskertti.

Oblysta sý basý qaýpi bar 85 eldi meken bar. Bul aýyldarda 6068 adam turady.

«SQO TJD sý tasqynyna qarsy oblystyq shtab jumys istep jatyr. Qazirgi ýaqytta óńirdegi sý qoımalaryna, ózen-kólderge olardaǵy ózgeristi baıqaý úshin monıtorıng júrgizip jatyrmyz. Búginge deıin Petropavl men eldi mekenderden 570 myń tekshe metr qar shyǵaryldy. Departamenttiń sý tasqynymen kúreske arnalǵan kúsh-quraldary daıyn», - deıdi SQO tótenshe jaǵdaılar departamenti basqarmasynyń bastyǵy Marat Muratov.