SQO-da ekstremızmdi nasıhattaıtyn ádebıetti engizý derekteri anyqtaldy
SQO Polıtsııa departamenti baspasóz qyzmetiniń habarlaýynsha, ekstremızmge qarsy is-qımyl basqarmasy din salasynda zańnamanyń buzylýyna jol bermeý úshin jumystar atqarady. Oblys aýmaǵyna kiretin kólikter turaqty tekseriledi. Jyl basynan óńirde ruqsat etilmegen ádebıetti engizýdiń alty deregi anyqtaldy.
Qarasha aıynyń sońynda «Jańa jol» beketinde Reseı Federatsııasynyń 38 jastaǵy turǵyny mingen «GAZel» avtokóligi tekserilip, mashınanyń salonynan 9 kompakt-dıski tabyldy. Onyń bireýinde ekstremızmdi nasıhattaıtyn materıaldar bolǵan.
«Ákimshilik jaýapkershilikke tartylǵan taǵy beseýi – Qyrǵyzstan Respýblıkasynyń azamattary. Olardyń barlyǵy dinı alaýyzdyqty qozdyrýdy maqsat etetin ádebıetti ózderiniń jeke qoldanysy úshin alyp júrgenderin aıtqan. Sot olardyń barlyǵyn kináli dep sheshti. Ákimshilik quqyq buzýshylyq týraly kodekstiń 453-baby boıynsha ákimshilik jaza taǵaıyndaldy. ıAǵnı jeke tulǵa bolsa 100 AEK bastap, iri kásipkerlik sýbektisi bolsa 1500 AEK mólsherine deıin aıyppul tóleıdi», - dedi SQO PD ekstremızmge qarsy is-qımyl basqarmasynyń basshysy Rýslan Muhambetjanov.
Mundaı úlken mólsherde aıyppul tólemeý úshin qoldaǵy dinı ádebıetti tekserýge bolady. Ekstremızmdi nasıhattaıtyn, sol sebepti respýblıka aýmaǵynda paıdalanýǵa tyıym salynǵan dinı ádebıettiń tizimi bar. Ol tizimmen Quqyqtyq statıstıka boıynsha komıtettiń jáne QR Bas prokýratýrasynyń arnaıy esep saıtynda tanysýǵa bolady.
Jalpy oblysta bıyl din salasyna qatysty zań buzýshylyqtyń otyzǵa jýyq deregi anyqtaldy.