SQO-da Ekinshi dúnıejúzilik soǵys jaýyngerleri jaıynda elektrondy baza jasalyp jatyr

PETROPAVL. QazAqparat – Soltústik Qazaqstan oblysynda memlekettik arhıv Ekinshi dúnıejúzilik soǵysqa óńirden attanǵan maıdangerler jaıynda tolyq aqparat beretin elektrondy baza jasap jatyr, dep habarlaıdy QazAqparat tilshisi.

Elektrondy baza oblystyń Qorǵanys isteri jónindegi departamenttiń málimetteri negizinde jasalyp jatyr. Oǵan resmı qujattar basshylyqqa alyna otyryp, Qyzyljar óńirinen soǵysqa attanǵan jaýyngerlerdiń tizimi jáne olar jaıynda barynsha tolyq aqparat engizilmek.

«SQO Qorǵanys isteri jónindegi departament pen onyń 13 aýdandaǵy bólimderimen tyǵyz jumys atqardyq. Bizge 64 myń adamnyń tizimin bergen bolatyn. Alaıda, jumys barysynda óńirden Ekinshi dúnıejúzilik soǵysqa attanǵan maıdangerlerdiń sany odan da kóp ekeni anyqtalyp, qazir sany 70 myńnan asyp ketti. Biz, sondaı-aq 1995-1999 jyldar aralyǵynda basylyp shyqqan bes tomdyq «Bozdaqtar», Uly Jeńistiń 65 jyldyǵyna oraı jaryq kórgen «Soldaty Pobedy» kitaptaryn paıdalandyq», - deıdi Soltústik Qazaqstan memlekettik arhıviniń bólim basshysy Mereke Baımuqanov.

Elektrondy baza orys tilinde jasalyp jatyr.

Mamandardyń aıtýynsha, oǵan bar aqparattyń orys tilinde bolýy sebep.

«Bazada jaýyngerdiń týǵan jeri, jyly, qaıdan, qaı jyly áskerge alyndy, qaı jerde, qandaı shende soǵysty, áskerı mamandyǵy, dıvızııasy, polki, alǵan jaraqattary, marapattary – barlyǵy kórsetiledi. Bul – úlken jumys. Keıin osy málimetterdi paıdalanyp, qazaq tilinde kitap etip shyǵarý josparda bar, árıne eger oǵan qarjy bólinip jatsa», - deıdi Mereke Baımuqanov.

Maıdangerler jaıyndaǵy elektrondy bazany arhıv qyzmetkerleri 9 mamyr – Uly Jeńistiń 75 jyldyǵyna deıin jasap shyǵyp, tusaýyn kespek. Ol ınternet arqyly bárine qoljetimdi bolady.