SQO-da eki jigit túrmege telefondar men onyń kerek-jaraǵyn kirgizbek bolǵan

PETROPAVL. QazAqparat – Soltústik Qazaqstan oblysynda qylmystyq-atqarý júıesiniń №51 tótenshe qaýipsizdik mekemesine uıaly telefondar, qulaqqaptar men sım-kartalar engizbek bolǵan eki jigit ustaldy, dep habarlaıdy QazAqparat tilshisi.

SQO boıynsha qylmystyq-atqarý júıesi departamenti baspasóz qyzmetiniń málimetinshe, oqıǵa 23 jeltoqsan kúni bolǵan. Bireýler jeńil kólikpen kelip, №51 mekemesiniń 2 jáne 3 ýchaskeleri arasyna oralǵan zat laqtyrǵan. Ol aýmaqqa birden mekemeniń qyzmetkerleri jiberilip, qaraýyldyń tehnıkalyq jolynda elektrodqa taspamen oralǵan 2 túıinshekti tapty.

Oramanyń ishinde 5 smartfon, sondaı-aq 3 qulaqqap, bir telefon qýattaǵysh jáne 7 sım-karta bolǵan. Olardyń bári tárkilendi.

25 jeltoqsan kúni jeńil kólikti jol polıtsııasynyń ınspektorlary Saýmalkól eldi mekenine kireberiste ustady. Mashına 27 jastaǵy M. esimdi jigittiki, onyń qasynda 31 jastaǵy A. degen er adam bolǵan.

Jaýap alý barysynda A. ruqsat etilmegen zattardyń túrmede jazasyn ótep jatqan B.-ǵa arnalǵanyn aıtyp, jazbasha túsinikteme bergen. Endi A. bul áreketi úshin ákimshilik jaýapkershilikke tartylmaq. Tıisti materıaldar jınalyp jatyr.